પાલનપુર, 16 ફેબ્રુઆરી 2026: જિલ્લામાં રોડ અકસ્માતના બનાવો વધતા જાય છે. ત્યારે વધુ એક અકસ્માતનો બનાવ થરા હાઈવે પર સર્જાયો હતો. કાંકરેજ તાલુકાના ડુંગરાસણ સ્ટેશન નજીક શિહોરી-થરા નેશનલ હાઈવે પર તેલ ભરેલું એક ટ્રેલર પલટી ગયું હતું. આ અકસ્માતમાં પામોલિન તેલના ડબ્બા અને પાઉચ રસ્તા પર વેરવિખેર થઈ ગયા હતા અને મોટા પ્રમાણમાં પોમોલિન તેલ ઢોળાતા હાઈવે તેલથી રેલમછેલ બન્યો હતો. જો કે આ બનાવમાં કોઈ જાનહાનિ થઈ ન હતી.
આ અકસ્માતના બનાવની વિગત એવી છે કે, કાંકરેજ તાલુકાના ડુંગરાસણ સ્ટેશન નજીક શિહોરી-થરા નેશનલ હાઈવે પર રાતના સમયે તેલ ભરેલું એક ટ્રેલર પલટી ગયું હતું ટ્રેલર પલટી મારતાની સાથે જ હાઈવે પર તેલના ડબ્બા તૂટી ગયા હતા, જેના કારણે રોડ પર તેલ ફેલાઈ ગયું હતું. ઘટનાની જાણ થતા જ આસપાસના લોકોના ટોળા સ્થળ પર ઉમટી પડ્યા હતા. તેના લીધે હાઈવે પર ટ્રાફિક જામ સર્જાયો હતો. આ બનાવની જાણ થતાં જ શિહોરી પોલીસ તાત્કાલિક ઘટના સ્થળે પહોંચી ગઈ હતી અને પરિસ્થિતિને કાબૂમાં લીધી હતી. પોલીસે સુરક્ષા વ્યવસ્થા જાળવી રાખી હતી અને આગળની કાર્યવાહી હાથ ધરી હતી.
ઉલ્લેખનીય છે કે, આ જ નેશનલ હાઈવે પર થોડા સમય પહેલા પાઇપ ભરેલું એક અન્ય ટ્રેલર પણ પલટી ગયું હતું. આ વિસ્તારમાં અકસ્માતોની સંખ્યા વધી રહી હોવાનું જણાય છે.
