ઓપરેશન સિંદૂર પછી બીજી વખત અમેરિકાની મુલાકાતે પહોંચેલા પાકિસ્તાનના આર્મી ચીફ ફિલ્ડ માર્શલ અસીમ મુનીરે ફરી એકવાર ઝેર ઓકતાની સાથે સત્યની કલુબાત કરી હતી. મુનીરે કહ્યું કે, ભારત એક ચમકતી કાર છે, જ્યારે પાકિસ્તાન કચરો વહન કરતો ડમ્પિંગ ટ્રક છે. અસીમ મુનીરે અમેરિકાના ફ્લોરિડાના ટામ્પામાં બ્લેક ટાઈ ડિનર પાર્ટીમાં હાજરી આપી હતી. આ પાર્ટીનું આયોજન પાકિસ્તાની ઉદ્યોગપતિ અદનાન અસદે કર્યું હતું.
પાકિસ્તાનના આર્મી ચીફે ઓપરેશન સિંદૂર પર અમેરિકામાં પોતાનો ગુસ્સો ઠાલવ્યો હતો. મુનીરે બાલિશ ધમકી આપી હતી કે જો ભારતને કારણે પાકિસ્તાનનું અસ્તિત્વ જોખમમાં આવશે તો પાકિસ્તાન તેનાથી અડધી દુનિયાને ડૂબાડી દેશે. અસીમ મુનીરનું આ નિવેદન અમેરિકા તરફથી ભારત સામે પાકિસ્તાનની પહેલી ધમકી છે.
અસીમ મુનીરે સિંધુ જળ સંધિ સ્થગિત કરવા બદલ ભારતને ધમકી આપી હતી. અહેવાલ અનુસાર, અસીમ મુનીરે કહ્યું, “અમે ભારત બંધ બાંધે તેની રાહ જોઈશું અને જ્યારે ભારત આવું કરશે, ત્યારે અમે 10 મિસાઇલો છોડીશું. સિંધુ નદી ભારતની પારિવારિક મિલકત નથી, આપણી પાસે મિસાઇલોની અછત નથી.”
પાકિસ્તાન ભારતને કેવી રીતે નુકસાન પહોંચાડી શકે છે તે સમજાવવા માટે, મુનીરે એક ઉદાહરણ આપ્યું અને કહ્યું, “હું પરિસ્થિતિ સમજાવવા માટે એક સરળ ઉદાહરણનો ઉપયોગ કરીશ. ભારત ફેરારીની જેમ હાઇવે પર આવતી ચમકતી મર્સિડીઝ છે, પરંતુ આપણે કચરો, ઇંટો અને પથ્થરોથી ભરેલો ડમ્પ ટ્રક છીએ. જો આ ટ્રક તે કારને ટક્કર મારે છે, તો કોને નુકસાન થશે?”
પાકિસ્તાની આર્મી ચીફ મુનીરે કહ્યું, “અમે ભારતના પૂર્વથી શરૂઆત કરીશું, જ્યાં તેઓએ તેમના સૌથી મૂલ્યવાન સંસાધનો સ્થાપિત કર્યા છે અને પછી પશ્ચિમ તરફ આગળ વધશે.” ફિલ્ડ માર્શલ અસીમ મુનીરની છબી ધાર્મિક રીતે કટ્ટરપંથી જનરલની છે. મુનીર પાકિસ્તાનના પહેલા આર્મી ચીફ છે જેમણે મદરેસામાં અભ્યાસ કર્યો છે. અસીમ મુનીર ઘણીવાર તેમના દલીલોને સમર્થન આપવા માટે ધાર્મિક ઉદાહરણોનો ઉપયોગ કરે છે.
