બિહારઃ ચૂંટણી પંચે ડ્રાફ્ટ મતદાર યાદીમાંથી બાકાત 65 લાખ મતદારોના નામ વેબસાઇટ પર અપલોડ કર્યા
નવી દિલ્હીઃ ચૂંટણી પંચે બિહારમાં વિશેષ સઘન સુધારા- SIR પછી પ્રકાશિત ડ્રાફ્ટ મતદાર યાદીમાં બાકાત રહેલા 65 લાખ મતદારોની યાદી સત્તાવાર વેબસાઇટ અપલોડ કરી છે. તેમાં ડ્રાફ્ટ યાદીમાં તેમનો સમાવેશ ન થવાનું કારણ પણ જણાવાયું છે.બિહાર ચૂંટણી પંચ કાર્યાલયે એક નોટિસમાં જણાવ્યું છે કે BLO એ રાજકીય પક્ષો, બૂથ-સ્તરના એજન્ટોની મદદથી એવા મતદારોની યાદી તૈયાર કરી છે જેમની ગણતરી સ્લિપ પ્રાપ્ત થઈ નથી. નોટિસમાં વધુમાં જણાવાયું છે કે કોઈપણ અસંતુષ્ટ વ્યક્તિ તેના આધાર કાર્ડની નકલ સાથે પોતાનો દાવો રજૂ કરી શકે છે.
અત્રે ઉલ્લેખનીય છે કે તાજેતરમાં સુપ્રીમ કોર્ટે બિહારના મતદાર યાદી સુધારણા (SIR) કેસની સુનાવણી કરી હતી. સુપ્રીમ કોર્ટે ચૂંટણી પંચને પૂછ્યું કે કાઢી નાખવામાં આવેલા 65 લાખ મતોનો ડેટા કેમ જાહેર કરવામાં આવ્યો નથી. સુપ્રીમ કોર્ટે કહ્યું કે તેને જાહેર કરો. ચૂંટણી પંચે કહ્યું કે ઠીક છે, જો તમારો આદેશ હોય તો અમે તે કરીશું. જસ્ટિસ કાંતે કહ્યું કે અમે નથી ઇચ્છતા કે નાગરિકોના અધિકારો રાજકીય પક્ષોના કાર્યકરો પર નિર્ભર રહે. સુપ્રીમ કોર્ટે ચૂંટણી પંચને કહ્યું કે તમે સાંભળ્યું હશે કે ડ્રાફ્ટ યાદીમાં મૃત કે જીવંત લોકો અંગે ગંભીર વિવાદ ચાલી રહ્યું છે. સુપ્રીમ કોર્ટે ચૂંટણી પંચને પૂછ્યું કે આવા લોકોને ઓળખવા માટે તમારી પાસે કઈ પદ્ધતિ છે? જેથી પરિવાર જાણી શકે કે તેમના સભ્યને મૃત તરીકે યાદીમાં સામેલ કરવામાં આવ્યો છે? સુપ્રીમ કોર્ટે કહ્યું કે તમારે કાઢી નાખવામાં આવેલા લોકોની યાદી પણ વેબસાઇટ પર મૂકવી જોઈએ, જેથી લોકો વાસ્તવિકતાથી વાકેફ થઈ શકે. આધાર નંબર અથવા અન્ય કોઈપણ દસ્તાવેજ નોંધાયેલ, EPIC અને કાઢી નાખવાનું કારણ સ્પષ્ટ કરો.
