પાકિસ્તાનના પૂર્વ કેપ્ટન વસીમ અકરમ સામે સટ્ટા બેટીંગ એપને પ્રોત્સાહન આપવા મામલે ફરિયાદ નોંધાઈ

પાકિસ્તાનના ભૂતપૂર્વ કેપ્ટન વસીમ અકરમ સામે રમતગમત સંબંધિત ઓનલાઈન ‘જુગાર અને સટ્ટાબાજી’ પ્લેટફોર્મ સાથે જોડાવા અને પ્રોત્સાહન આપવા બદલ ફરિયાદ દાખલ કરવામાં આવી છે. ફરિયાદી મુહમ્મદ ફૈઝે લાહોરમાં નેશનલ સાયબર ક્રાઈમ એજન્સી (NCCIA) માં ફરિયાદ નોંધાવી છે, જેમાં અકરમ સામે જુગાર અને સટ્ટાબાજી એપને પ્રોત્સાહન આપવા બદલ કાયદેસરની કાર્યવાહી કરવાની માંગ કરવામાં આવી છે.

ફૈઝે અકરમ પર વિદેશી સટ્ટાબાજી એપ ‘બાઝી’ સાથે સંકળાયેલા હોવાનો આરોપ લગાવ્યો છે. તેમણે કહ્યું કે પાકિસ્તાનનો આ ભૂતપૂર્વ ફાસ્ટ બોલર આ સટ્ટાબાજી એપ બ્રાન્ડનો પ્રચાર કરી રહ્યો છે. ફરિયાદીએ કહ્યું, ‘સોશિયલ મીડિયા પર ફરતા થયેલા એક પોસ્ટર અને વિડિયો ક્લિપમાં વસીમ અકરમ ઓનલાઈન પ્લેટફોર્મને સમર્થન આપતા જોવા મળે છે, જેના કારણે સામાન્ય લોકોમાં એપ પ્રત્યે રસ જાગ્યો છે. ફરિયાદીએ NCCIA ને ઇલેક્ટ્રોનિક ક્રાઈમ એક્ટ 2016 હેઠળ અકરમ સામે કડક કાનૂની કાર્યવાહી કરવા વિનંતી કરી છે.