શ્રીનગર : જમ્મુ-કાશ્મીરના પૂંછ જિલ્લામાં મોટી દુર્ઘટના બની છે. પૂંછના સુરનકોટ વિસ્તારના દ્રાબા ખાતે આવેલ 16 આરઆર (રાષ્ટ્રીય રાઈફલ્સ)ના કેમ્પની અંદર અચાનક ગ્રેનેડ વિસ્ફોટ થયો હતો. આ ઘટનામાં એક જવાન શહીદ થયા છે.
મળતી માહિતી મુજબ, આ ઘટના સાંજે બની હતી. તે સમયે જવાન કેમ્પની એક ચોકી પર સંત્રી ગાર્ડની ફરજ બજાવી રહ્યા હતા. એ દરમ્યાન ગ્રેનેડ ફાટતા સિપાહી ચૌધરી ભાવેશ શહીદ થયા હતા. વિસ્ફોટ બાદ સેનાના જવાનો તાત્કાલિક હરકતમાં આવી ગયા હતા અને સમગ્ર વિસ્તારને સીલ કરી તપાસ શરૂ કરી દીધી હતી. સાથે જ સ્પેશિયલ ઓપરેશન ગ્રુપ (SOG) પોલીસ પણ ઘટનાસ્થળે પહોંચી તપાસમાં જોડાઈ ગઈ હતી.
સેનાના અધિકારીઓએ જણાવ્યું હતું કે, વિસ્ફોટનો અવાજ આવ્યો હતો, પરંતુ પ્રાથમિક તપાસમાં આ ઘટના આતંકવાદ સાથે જોડાયેલી હોવાનું જણાતું નથી. તેમ છતાં, બધી એજન્સીઓ દરેક સંભાવનાને ધ્યાનમાં રાખીને તપાસ કરી રહી છે.
