ભારતની 2030 કોમનવેલ્થ ગેમ્સની મેઝબાની માટે લંડનમાં સત્તાવાર દાવેદારી રજૂ, અમદાવાદ બનશે યજમાન
નવી દિલ્હીઃ ભારતે 2030ના કોમનવેલ્થ ગેમ્સની મેઝબાની માટે લંડનમાં યોજાયેલી મૂલ્યાંકન સમિતિ સમક્ષ પોતાનો પ્રસ્તાવ સત્તાવાર રીતે રજૂ કર્યો છે. ભારતીય પ્રતિનિધિ મંડળનું નેતૃત્વ ગુજરાત સરકારના માનનીય રમતગમત પ્રધાન હર્ષ સંઘવી અને CGA ઈન્ડિયાની અધ્યક્ષ ડૉ. પી.ટી. ઉષાએ કર્યું હતું. આ પ્રસંગે રમતગમત વિભાગના સચિવ હરી રંજન રાવ, MYASના પ્રધાન સચિવ અશ્વિની કુમાર, ગુજરાત સરકારના રમત-યુવા અને સાંસ્કૃતિક પ્રવૃત્તિ વિભાગના પ્રધાન સચિવ, અમદાવાદ મહાનગરપાલિકાના આયુક્ત બંછાનિધી પાણિ, રઘુરામ અય્યર (CEO, કોમનવેલ્થ ગેમ્સ એસોસિએશન), લેફ્ટ. જનરલ હરપાલસિંહ (કારોબારી બોર્ડ સભ્ય, CGA ઈન્ડિયા) અને અજય નારંગ (EA to President, CGA) પણ ભારતીય પ્રતિનિધિમંડળનો ભાગ હતા.
CGA ઈન્ડિયાના અધ્યક્ષે જણાવ્યું કે “ભારતની દાવેદારી માત્ર ક્ષમતાની નથી, પણ મૂલ્યોની પણ છે. અમદાવાદ, ગ્લાસગો 2026 બાદ ધ્વજ સંભાળવા અને 2034ના રમતો માટે પાયાની ભૂમિકા ભજવવા તૈયાર છે, જેથી સદીના આ કોમનવેલ્થ ગેમ્સ ઇતિહાસને માન આપીને ભવિષ્યને આકાર આપી શકે.” કોમનવેલ્થ ગેમ્સ 2030નું ખાસ ઇતિહાસિક મહત્વ છે, કારણ કે તે કોમનવેલ્થ ગેમ્સ આંદોલનના 100 વર્ષ પૂર્ણ થવાનું પ્રતિક છે. આ શતાબ્દી ઉજવણી માટે અમદાવાદને યજમાન શહેર તરીકે સ્થાન આપવામાં આવ્યું છે. શહેરમાં આંતરરાષ્ટ્રીય સ્તરના સ્ટેડિયમ, મજબૂત ટ્રાન્સપોર્ટ સિસ્ટમ અને ઉચ્ચ ગુણવત્તાવાળા આવાસની સુવિધાઓ સાથે વિશ્વસ્તરીય રમતગમત ઇન્ફ્રાસ્ટ્રક્ચર ઉપલબ્ધ છે.
ગેમ્સ રીસેટ સિદ્ધાંતો અનુસાર પ્રસ્તાવમાં સામર્થ્ય, સમાનતા, લવચીકતા અને સ્થિરતા પર ભાર મુકાયો છે. પેરા-સ્પોર્ટ્સનું એકીકરણ, માનવ અધિકારોનું સંરક્ષણ, જાતીય સમાનતા પ્રોત્સાહન અને લાંબા ગાળાની વારસાગત માળખાકીય વ્યવસ્થા ઊભી કરવાનું વચન આપવામાં આવ્યું છે. આથી માત્ર રમતો જ નહીં, પરંતુ એથ્લીટ્સ, સમુદાયો અને સમગ્ર કોમનવેલ્થને લાભ મળી રહે તે સુનિશ્ચિત થશે.
ICC ક્રિકેટ વર્લ્ડ કપ, IPL અને 2022ના રાષ્ટ્રીય રમતો જેવી ભવ્ય ઇવેન્ટ્સના સફળ આયોજનથી અમદાવાદે પોતાની મેઝબાની ક્ષમતા સાબિત કરી છે. તેમજ અમદાવાદ આગામી વર્ષોમાં એશિયન અક્વેટિક્સ 2025, એશિયન વેઇટલિફ્ટિંગ ચેમ્પિયનશિપ 2026, વર્લ્ડ પોલીસ એન્ડ ફાયર ગેમ્સ 2029 સહિત અનેક આંતરરાષ્ટ્રીય સ્પર્ધાઓનું આયોજન પણ કરશે, જેનાથી 2030 સુધી અનુભવ વધુ મજબૂત થશે અને ભારતની દાવેદારીને વજન મળશે.
