નવી દિલ્હી: પ્રધાનમંત્રી નરેન્દ્ર મોદી આવતીકાલથી જોર્ડન, ઇથોપિયા અને ઓમાનની મુલાકાતે જશે. પ્રથમ તબક્કામાં પ્રધાનમંત્રી નરેન્દ્ર મોદી આવતીકાલે જોર્ડનની બે દિવસીય મુલાકાતે જશે. તેમની મુલાકાત જોર્ડનના રાજા અબ્દુલ્લા દ્વિતીય બિન અલ હુસૈનના આમંત્રણ પર થઈ રહી છે. આ મુલાકાત ભારત અને જોર્ડન વચ્ચેના રાજદ્વારી સંબંધોની 75મી વર્ષગાંઠ સાથે સુસંગત છે. ભારત જોર્ડનનો ત્રીજો સૌથી મોટો વેપારી ભાગીદાર છે, બંને દેશો વચ્ચેનો કુલ વેપાર આશરે બે અબજ 80 કરોડ ડોલરનો છે.
મુલાકાતના બીજા તબક્કામાં મોદી 16 ડિસેમ્બરે ઇથોપિયા જશે. પ્રધાનમંત્રી મોદી ઇથોપિયાના પ્રધાનમંત્રી અબીય અહેમદ અલી સાથે દ્વિપક્ષીય અને પ્રતિનિધિમંડળ સ્તરની વાટાઘાટો કરશે. મુલાકાતના અંતિમ તબક્કામાં પ્રધાનમંત્રી મોદી 17 ડિસેમ્બરે ઓમાન જશે. પ્રધાનમંત્રી સાથે એક ઉચ્ચ સ્તરીય પ્રતિનિધિમંડળ પણ છે. પ્રધાનમંત્રીની ઓમાન મુલાકાત દરમિયાન અનેક કરારો પર હસ્તાક્ષર થવાની અપેક્ષા છે.
