નવી દિલ્હીઃ પ્રધાનમંત્રી નરેન્દ્ર મોદી 15 થી 18 જૂન દરમિયાન સાયપ્રસ, કેનેડા અને ક્રોએશિયાની સત્તાવાર મુલાકાતે રહેશે. આ પ્રવાસનું મુખ્ય કેન્દ્ર કેનેડામાં યોજાનારી જી-7 સમિટ છે. વિદેશ મંત્રાલયના જણાવ્યા અનુસાર, 16-17 જૂનના રોજ, પ્રધાનમંત્રી કેનેડાના કનાનાસ્કિસ શહેરમાં આયોજિત જી-7 સમિટમાં ભાગ લેશે. વિશ્વની સાત સૌથી મોટી અર્થવ્યવસ્થાઓ ધરાવતા દેશોના જૂથના સમિટમાં આ તેમનો સતત છઠ્ઠો દેખાવ હશે. મંત્રાલયના જણાવ્યા અનુસાર, આ પરિષદમાં તેઓ ઊર્જા સુરક્ષા, કૃત્રિમ બુદ્ધિમત્તા, ક્વોન્ટમ ટેકનોલોજી અને ટેકનોલોજીકલ નવીનતા જેવા વૈશ્વિક વિષયો પર વિચારો શેર કરશે. આ દરમિયાન, તેઓ જી-7 દેશોના નેતાઓ, આમંત્રિત દેશો અને આંતરરાષ્ટ્રીય સંગઠનોના વડાઓને પણ મળશે. ઘણી દ્વિપક્ષીય બેઠકોનો પણ પ્રસ્તાવ છે.
ઉલ્લેખનીય છે કે, પ્રધાનમંત્રી નરેન્દ્ર મોદીની કેનેડા મુલાકાત ભારતના દૃષ્ટિકોણથી ખૂબ જ મહત્વપૂર્ણ માનવામાં આવે છે. આ મુલાકાત જી-7 સમિટમાં ભારતની સક્રિય ભૂમિકા દર્શાવવાની તેમજ ભારત-કેનેડા સંબંધોમાં તણાવ દૂર કરવાની તક છે. ભારતને આમંત્રણ આપતાં, કેનેડાના વડા પ્રધાન માર્ક કાર્નીએ સ્પષ્ટ કર્યું કે, ભારત વિશ્વની પાંચમી સૌથી મોટી અર્થવ્યવસ્થા છે અને વૈશ્વિક પુરવઠા શૃંખલામાં તેની ભૂમિકા નિર્ણાયક છે. વડા પ્રધાનનો વિદેશ પ્રવાસ 15 જૂને સાયપ્રસથી શરૂ થશે. છેલ્લા બે દાયકામાં ભારતીય વડા પ્રધાનની સાયપ્રસની આ પહેલી મુલાકાત હશે. વડા પ્રધાન, નિકોસિયામાં રાષ્ટ્રપતિ નિકોસ ક્રિસ્ટોડુલાઈડ્સને મળશે અને લિમાસોલમાં વ્યાપારી નેતાઓને સંબોધિત કરશે. આ મુલાકાત ભારત અને સાયપ્રસ વચ્ચેના રાજદ્વારી, આર્થિક અને સાંસ્કૃતિક સંબંધોને નવી મજબૂતી આપશે તેવી અપેક્ષા છે. કેનેડા પછી, વડા પ્રધાન 18 જૂને ક્રોએશિયાની મુલાકાત લેશે, જે ભારતીય વડા પ્રધાનની પ્રથમ મુલાકાત હશે. તેઓ વડા પ્રધાન આન્દ્રેજ પ્લેનકોવિક અને રાષ્ટ્રપતિ જોરાન મિલાનોવિચ ને મળશે. આ મુલાકાત ભારત અને યુરોપિયન યુનિયન વચ્ચેના સંબંધોને વધુ મજબૂત બનાવવા તરફ એક ઐતિહાસિક પગલું હશે.
