નવી દિલ્હીઃ ઓપરેશન સિંદૂર પછી, આતંકવાદીઓ ફરી એકવાર સક્રિય થઈ રહ્યાં છે. ગુરુવારે, સુરક્ષા દળોએ જમ્મુ-કાશ્મીરના ઉધમપુર જિલ્લાના જંગલ વિસ્તારમાં પાકિસ્તાનના આતંકવાદી સંગઠન જૈશ-એ-મોહમ્મદના એક આતંકવાદીને ઠાર માર્યો હતો. તેમજ, ત્રણ અન્ય આતંકવાદીઓ હજુ પણ ઘેરાયેલા છે. એક અહેવાલ મુજબ, છેલ્લા એક વર્ષથી આ ચાર આતંકવાદીઓની શોધ ચાલી રહી હતી.
ભારત અને પાકિસ્તાન વચ્ચે પહેલગામ આતંકવાદી હુમલા પછી, તણાવ ઘણો વધી ગયો હતો. આ પછી, ભારતીય સેનાએ ઓપરેશન સિંદૂર દરમિયાન સૌથી વધુ આતંકવાદીઓને ઠાર માર્યા હતા. ઓપરેશન સિંદૂર દરમિયાન પણ આતંકવાદીઓએ ઘણી વખત ઘૂસણખોરી કરવાનો પ્રયાસ કર્યો હતો, પરંતુ સેનાએ તેમને ઠાર માર્યા હતા. હવે સેનાના જવાનોએ ઉધમપુરમાં એક આતંકવાદીને ઠાર માર્યો છે. આ અંગે, સંરક્ષણ વિભાગના પ્રવક્તાએ કહ્યું, “ભારતીય સેના અને જમ્મુ-કાશ્મીર પોલીસના ઓપરેશનમાં અત્યાર સુધી એક આતંકવાદી ઠાર મરાયો છે. ઓપરેશન હજુ પણ ચાલુ છે.”
તેમણે કહ્યું કે, “‘ઓપરેશન બિહાલી’ કોડ નામ સાથેનું આ ઓપરેશન એવા સમયે શરૂ કરવામાં આવ્યું છે જ્યારે એક અઠવાડિયા પછી કાશ્મીરમાં વાર્ષિક અમરનાથ યાત્રા શરૂ થશે.” આ આતંકવાદીઓની શોધ છેલ્લા એક વર્ષથી ચાલી રહી હતી. જમ્મુ રેન્જના પોલીસ મહાનિરીક્ષક ભીમ સેન તુતીએ જણાવ્યું હતું કે, “આતંકવાદીઓ સવારે 8.30 વાગ્યાની આસપાસ મળી આવ્યા હતા. તેમની સંખ્યા ચાર છે અને અમે છેલ્લા એક વર્ષથી આ જૂથને શોધી રહ્યા હતા.”
તેમણે કહ્યું કે ધુમ્મસ હોવા છતાં, શોધખોળ કામગીરી ચાલુ છે અને હવામાન સુધર્યા પછી જ વાસ્તવિક પરિસ્થિતિ જાણી શકાશે. અધિકારીઓએ જણાવ્યું હતું કે ઘેરાયેલા આતંકવાદીઓ પાકિસ્તાન સ્થિત જૈશ-એ-મોહમ્મદના સભ્યો છે અને આર્મી પેરા કમાન્ડોની આગેવાની હેઠળની સંયુક્ત શોધ ટીમે તેમને કરુર નાલા નજીક છુપાયેલા જોયા હતા.
વહેલી સવારે, જમ્મુ સ્થિત આર્મીના ‘વ્હાઇટ નાઈટ કોર્પ્સ’ એ ‘X’ પર એક પોસ્ટમાં કહ્યું હતું કે, “સચોટ માહિતીના આધારે, ભારતીય સેના અને જમ્મુ-કાશ્મીર પોલીસે બસંતગઢના બિહાલી વિસ્તારમાં સંયુક્ત ઓપરેશન શરૂ કર્યું. આતંકવાદીઓનો સામનો કરવામાં આવ્યો હતો. ઓપરેશન હજુ પણ ચાલુ છે.”
