સ્માર્ટફોન ખરાબ થતા પહેલા આપે છે કેટલાક સંકેત, જાણો સંકેત…
ફોનમાં નાની-મોટી સમસ્યા આવે ત્યારે મોટાભાગના લોકો તેને અવગણતા રહે છે, પરંતુ આવું કરવું જોખમી સાબિત થઈ શકે છે. ઘણા વખત ફોન સંપૂર્ણ રીતે બંધ થવા પહેલા જ કેટલાક સ્પષ્ટ સંકેતો આપતો હોય છે. જો તમે સમયસર આ સંકેતોને ઓળખી લો, તો ફોનને ખરાબ થવાથી બચાવી શકાય છે. કારણ કે એક વાર ફોન સંપૂર્ણ રીતે બંધ થઈ જાય પછી, રીપેરિંગ દરમિયાન તેમાં રહેલું મહત્વનું ડેટા ગુમાવવાનું જોખમ વધી જાય છે.
- ફોન ખરાબ થવાના પહેલાં મળતા સંકેતો
ફ્રીઝ થતી સ્ક્રીન (Freezing Screen) : આ ફોનની સૌથી સામાન્ય સમસ્યા છે. જો ફોન ચલાવતી વખતે સ્ક્રીન વારંવાર ફ્રીઝ થવા લાગે, એટલે કે ટચ કર્યા પછી પણ કોઈ રિસ્પોન્સ ન આપે, તો સમજી જજો કે ફોન હવે ધીમે ધીમે જવાબ આપવાનું બંધ કરી રહ્યો છે. આવી સ્થિતિમાં ફોનને રીસ્ટાર્ટ કરવો એકમાત્ર વિકલ્પ રહે છે. જો આવું વારંવાર થવા લાગ્યું હોય, તો હવે નવો ફોન લેવાનો સમય આવી ગયો છે.
ફોનનું વારંવાર રીસ્ટાર્ટ થવું : જો તમારો ફોન સ્વયં સતત રીસ્ટાર્ટ થવા લાગે, તો તે હાર્ડવેર અથવા સોફ્ટવેરની ખામીનું નિશાન છે. આવી સ્થિતિમાં સૌથી પહેલાં ફોનમાં રહેલું મહત્વનું ડેટા બેકઅપ રાખો અને પછી સર્વિસ સેન્ટરનો સંપર્ક કરો. સમયસર તપાસ કરાવવાથી મોટી ખામી અટકાવી શકાય છે.
અસામાન્ય ગરમી (Unusual Heating) : જો તમારો ફોન ઉપયોગમાં ન હોવા છતાં ગરમ થવા લાગે, તો તે બેટરીની ખામી, સોફ્ટવેર ઈશ્યુ, અથવા હાર્ડવેરના ખોટા કામને દર્શાવે છે. જો ફોન અતિશય ગરમ થવા લાગે, તો તે બેટરીને નુકસાન પહોંચાડી શકે છે અને ક્યારેક વિસ્ફોટનું જોખમ પણ રહે છે. તેથી આવી સ્થિતિમાં તરત જ ફોનને સર્વિસ સેન્ટર લઈ જવો જોઈએ.
