નવી દિલ્હી: કોંગ્રેસ સંસદીય પક્ષ (CPP) ના વડા સોનિયા ગાંધીએ સરકાર પર લોકસભામાં વક્ફ સુધારા બિલ મનસ્વી રીતે પસાર કરવાનો આરોપ લગાવ્યો હતો, અને દાવો કર્યો કે આ બિલ બંધારણ પર સ્પષ્ટ હુમલો છે અને સમાજને કાયમી ધ્રુવીકરણની સ્થિતિમાં રાખવાની ભારતીય જનતા પાર્ટી (BJP) ની ઇરાદાપૂર્વકની વ્યૂહરચનાનો એક ભાગ છે.
તેમણે સંસદ ભવનમાં યોજાયેલી સીપીપી બેઠકમાં ‘એક રાષ્ટ્ર, એક ચૂંટણી’ બિલ, મનરેગા, સંસદમાં ગતિરોધ અને અન્ય ઘણા મુદ્દાઓ પર સરકાર અને વડા પ્રધાન નરેન્દ્ર મોદી પર આકરા પ્રહારો કર્યા હતા. લોકસભામાં વકફ (સુધારા) બિલ, 2025 અને મુસ્લિમ વકફ (રદ) બિલ, 2024 વિવિધ વિપક્ષી પક્ષોના સભ્યોના જોરદાર વિરોધ વચ્ચે અને સાડા 10 કલાકથી વધુ ચર્ચા બાદ પસાર કરાયું હતું. વકફ (સુધારા) બિલ, 2025 288 મતોથી પસાર થયું હતું જ્યારે વિરોધ પક્ષના સભ્યોના સુધારાઓને નકારી કાઢવામાં આવ્યા હતા. ગૃહે મુસ્લિમ વકફ (રદ) બિલ, 2024 ને પણ ધ્વનિ મત દ્વારા મંજૂરી આપી હતી. સોનિયા ગાંધીએ કહ્યું, “આપણી લોકશાહી માટે ગંભીર ચિંતાનો વિષય છે કે લોકસભામાં વિપક્ષના નેતાને બોલવાની મંજૂરી નથી. તેવી જ રીતે, રાજ્યસભામાં, વિપક્ષના નેતા (મલ્લિકાર્જુન) ખડગેજીને વારંવાર વિનંતી કરવા છતાં તેઓ જે કહેવા માંગે છે અને ખરેખર કહેવું જોઈએ તે કહેવાની મંજૂરી નથી.”
તેમણે વધુમાં જણાવ્યું કે, તમારી જેમ, મેં પણ જોયું છે કે ગૃહ આપણા કારણે નહીં પણ શાસક પક્ષના વિરોધને કારણે સ્થગિત થાય છે. આ એક અસાધારણ અને આઘાતજનક બાબત હતી કારણ કે વિપક્ષને એવી ચિંતાઓ ઉઠાવતા અટકાવવા માટે કરવામાં આવ્યું હતું જે સરકારને મુશ્કેલીમાં મૂકી શકે છે. બિલ લગભગ મનસ્વી રીતે પસાર થયું હતું. અમારા પક્ષનું વલણ સ્પષ્ટ છે. આ બિલ બંધારણ પર જ એક ખુલ્લેઆમ હુમલો છે. આ આપણા સમાજને કાયમી ધ્રુવીકરણની સ્થિતિમાં રાખવાની ભાજપની સુનિયોજિત રણનીતિનો એક ભાગ છે. તેમણે આરોપ લગાવ્યો કે ‘એક રાષ્ટ્ર, એક ચૂંટણી’ બિલ બંધારણને નબળું પાડવાનો બીજો પ્રયાસ છે. કોંગ્રેસના ભૂતપૂર્વ પ્રમુખે કહ્યું, “અમે પણ આ કાયદાનો સખત વિરોધ કરીએ છીએ.”
સંસદ દ્વારા પસાર કરાયેલા મહિલા અનામત બિલનો ઉલ્લેખ કરતા સોનિયા ગાંધીએ કહ્યું, “બે વર્ષ પહેલાં બંને ગૃહો દ્વારા પસાર કરાયેલા મહિલા અનામત બિલને તાત્કાલિક લાગુ કરવાની અમારી અરજીને જાણી જોઈને અવગણવામાં આવી રહી છે, સાથે જ SC, ST અને OBC સમુદાયોની મહિલાઓ માટે એક તૃતીયાંશ અનામતની અમારી બીજી માંગણી પણ છે.” તેમણે આરોપ લગાવ્યો કે શિક્ષણ હોય, નાગરિક અધિકારો અને સ્વતંત્રતા હોય, સંઘીય માળખું હોય કે ચૂંટણીનું સંચાલન હોય, મોદી સરકાર દેશને ખાડામાં ધકેલી રહ્યાં છે જ્યાં બંધારણ ફક્ત કાગળ પર જ રહેશે. સોનિયા ગાંધીએ કહ્યું, “આપણા બધા માટે એ મહત્વપૂર્ણ છે કે આપણે જે યોગ્ય અને ન્યાયી છે તેના માટે લડતા રહીએ, મોદી સરકારની નિષ્ફળતા અને ભારતને એક સર્વેલન્સ સ્ટેટમાં ફેરવવાના તેના ઇરાદાને ઉજાગર કરીએ.”
તેમણે દાવો કર્યો હતો કે,, “આપણે બધા જાણીએ છીએ કે વડા પ્રધાને 2004-2014 દરમિયાન લેવામાં આવેલી ઘણી પહેલોને તેમની વ્યક્તિગત સિદ્ધિઓ તરીકે રિબ્રાન્ડ, રિપેકેજ અને માર્કેટિંગ કરી છે.” સોનિયા ગાંધીએ કહ્યું, “આપણી પોતાની જનસંપર્ક પ્રવૃત્તિઓ દ્વારા પણ આને ઉજાગર કરવાની જરૂર છે.”
