અમદાવાદ,12 ફેબ્રુઆરી 2026: કલોલની રહેતો અને 12માં ધોરણમાં ભણતો હિતેશ નામનો એક વિદ્યાર્થી ભાઈબંધો (મિત્રો)માં રોલો પાડવા માટે અમદાવાદથી થાર જીપ સેલ્ફ ડ્રાઈવ પર ભાડે લઈ આવ્યો હતો. કલોલના સર્વિસ રોડ પર થારના વિદ્યાર્થી ચાલકની મોજમસ્તીએ નિર્દોષ લોકોના જીવ જોખમમાં મૂક્યા હતા. સંસ્કૃતિ મૂવીપ્લેક્સ સામે સર્જાયેલા અકસ્માતમાં પૂરફાટ ઝડપે થાર ગાડીએ રિક્ષા અને બાઈક સહિત ત્રણ વાહનોનો કચ્ચરઘાણ વાળી દીધો હતો. પોલીસે ધો. 12માં ભણતા કારચાલક યુવકની ધરપકડ કરી છે.
આ બનાવ અંગે કલોલ તાલુકા પોલીસના કહેવા મુજબ કલોલના બોરીસણાની સૃષ્ટિ સોસાયટીમાં રહેતા કૈલાશભાઈ પુરબિયાનો 19 વર્ષીય પુત્ર હિતેશ પુરબિયા તેના સ્કૂલમાં ફંક્શન હોવાથી રોલો પાડવા માગતો હતો. આ માટે હિતેશ તેના બે મિત્રો સાથે મળી અમદાવાદથી થાર ગાડી ભાડે કરીને લાવ્યો હતો. બાદમાં ત્રણેય મિત્રોએ નજીકના પેટ્રોલ પંપ પરથી ઈંધણ પૂરાવ્યું અને હિતેશ પુરબિયાએ થારનું સ્ટીયરિંગ હાથમાં લઈને ગાડી પૂરપાટ ઝડપે દોડાવી હતી. દરમિયાન સ્કૂલે જતી વેળાએ સર્વિસ રોડ પર થાર પરથી કાબૂ ગુમાવતા હિતેશ પુરબિયાએ બાઈકચાલક, લોડિંગ રિક્ષા અને એક બાઈકને અડફેટે લીધા હતા. અકસ્માત એટલો ગંભીર હતો કે થારની ટક્કર વાગતા જ બાઈકચાલક ફૂટબોલની જેમ હવામાં ફંગોળાયો હતો અને બાઈક થારની નીચે ફસાઈ ગયું હતું. આ ઘટનામાં 3થી 4 લોકોને નાની-મોટી ઈજાઓ પહોંચી છે. જેમાં એક બે વર્ષનું બાળક પણ ઇજાગ્રસ્ત થયું છે. આ અકસ્માત સર્જાયા બાદ સ્થાનિકોના ટોળા ઉમટી પડ્યા હતા અને અફરાતફરીનો માહોલ સર્જાયો હતો, આ મામલે કલોલ તાલુકા પોલીસે તાત્કાલિક અકસ્માત સર્જનાર હિતેશ પુરબિયાની ધરપકડ કરી વધુ તપાસ હાથ ધરી છે. પોલીસ દ્વારા ગાડી ભાડે આપનાર એજન્સી વિરૂદ્ધ પણ તપાસ કરવાની તજવીજ હાથ ધરવામાં આવી છે.
