લદ્દાખમાં જમીનથી હવામાં હુમલો કરતી આકાશ પ્રાઈમ મિસાઈલ સિસ્ટમનું સફળ પરીક્ષણ કરાયું

નવી દિલ્હીઃ ભારતીય વાયુસેનાએ લદ્દાખમાં સ્વદેશી રીતે વિકસિત સપાટીથી હવામાં પ્રહાર કરતી આકાશ પ્રાઇમ મિસાઇલ સિસ્ટમનું સફળતાપૂર્વક પરીક્ષણ કર્યું છે. આ મિસાઇલ DRDO દ્વારા વિકસાવવામાં આવી છે અને આ પરીક્ષણ તેના વરિષ્ઠ અધિકારીઓના સહયોગથી કરવામાં આવ્યું છે. સંરક્ષણ અધિકારીઓએ જણાવ્યું હતું કે અમે 15 હજાર ફૂટથી વધુ ઊંચાઈથી ઝડપથી આગળ વધતા હવાઈ લક્ષ્યો પર મિસાઇલથી બે સીધા હુમલા કર્યા હતા, જેમાં તેની અસર વિશે માહિતી પ્રાપ્ત થઈ હતી.

સંરક્ષણ અધિકારીઓના જણાવ્યા અનુસાર, આકાશ પ્રાઇમ સેનાની ત્રીજી અને ચોથી આકાશ રેજિમેન્ટમાં શામેલ કરવામાં આવશે. ઓપરેશન સિંદૂર દરમિયાન, તેણે લક્ષ્ય પર સફળતાપૂર્વક હુમલો કર્યો હતા. આ મિસાઇલે પાકિસ્તાનના ચીની જેટ અને તુર્કી ડ્રોનનો સામનો કર્યો હતો. અધિકારીઓએ જણાવ્યું હતું કે સ્વદેશી રીતે વિકસિત આકાશ સપાટીથી હવામાં પ્રહાર કરતી મિસાઇલ સિસ્ટમ જમ્મુ અને કાશ્મીરમાં પશ્ચિમી સરહદ અને નિયંત્રણ રેખા (LoC) પર પાકિસ્તાન દ્વારા કરવામાં આવતા ઘણા ડ્રોન હુમલાઓને રોકવામાં ખૂબ મદદરૂપ સાબિત થઈ છે.

અત્રે ઉલ્લેખનીય છે કે આકાશ પ્રાઇમ એ DRDO ની એક આધુનિક વાયુ સંરક્ષણ પ્રણાલી છે, જે દુશ્મનના જેટ અને ડ્રોનને તોડી પાડવા માટે સંપૂર્ણપણે સક્ષમ છે. આ મિસાઇલ ભારતીય વાયુસેનાની શક્તિને વધુ મજબૂત બનાવશે. આ સિસ્ટમ લદ્દાખ જેવા ઊંચા સ્થળોએ અસરકારક છે. આકાશ પ્રાઇમ સિસ્ટમ હવે ભારતીય સેનાના વાયુ સંરક્ષણના ત્રીજા અને ચોથા એકમ (રેજિમેન્ટ)નો ભાગ બનશે, જેનો અર્થ એ છે કે હવે આ નવી સિસ્ટમ સેનાના બે વધુ એકમોમાં સમાવવામાં આવશે, જેથી દુશ્મનના હવાઈ હુમલાઓથી વધુ સારી સુરક્ષા પૂરી પાડી શકાય.