અમેરિકાઃ પચાસથી વધુ દેશોએ વેપાર વાટાઘાટ શરૂ કરવા વ્હાઇટ હાઉસનો સંપર્ક કર્યો
અમેરિકાના રાષ્ટ્રપ્રમુખ ડોનાલ્ડ ટ્રમ્પે વ્યાપક નવા ટેરિફની જાહેરાત કર્યા પછી 50થી વધુ દેશોએ વેપાર વાટાઘાટ શરૂ કરવા માટે વ્હાઇટ હાઉસનો સંપર્ક કર્યો છે. ટ્રમ્પ વહીવટીતંત્રના ટોચના અધિકારીઓએ આ ટેરિફનો બચાવ કર્યો હતો. ટ્રમ્પની જાહેરાતને પગલે ગયા સપ્તાહે અમેરિકાનાં શેરોના મૂલ્યમાં લગભગ છ ટ્રિલિયન અમેરિકન ડોલરનું નુકસાન થયું છે.ટ્રેઝરી સેક્રેટરી સ્કોટ બેસેન્ટે ખાનગી સમાચાર ચેનલને જણાવ્યું કે, ગયા બુધવારની જાહેરાત પછી 50થી વધુ દેશોએ અમેરિકા સાથે વાટાઘાટો શરૂ કરી દીધી છે.
એશિયન બજારોએ દિવસની શરૂઆત ભારે ઘટાડા સાથે કરી હતી. જોકે, ટ્રમ્પે ડરને ઓછો કરવાનો પ્રયાસ કર્યો અને સૂચવ્યું કે તેમના ટેરિફને કારણે બજારમાં વિક્ષેપ લાંબાગાળાના વેપાર અસંતુલનને સુધારવા માટેની જરૂરી ‘દવા’ છે.
વૈશ્વિક બજારો ખાસ કરીને એશિયન શેરબજારોમાં થયેલા નુકસાન વચ્ચે અમેરિકાના પ્રમુખ ડોનાલ્ડ ટ્રમ્પે તેમની વિવાદાસ્પદ ટેરિફ નીતિઓનો બચાવ કર્યો હતો. તેમણે કહ્યું કે, વિશ્વના નેતાઓ “પારસ્પરિક ટેરિફ” પર “સમજૂતી કરવા માટે ઉત્સુક” છે. એરફોર્સ વનમાં પત્રકારો સાથે વાત કરતા, યુએસ પ્રમુખ ડોનાલ્ડ ટ્રમ્પે બજારના ઉતાર-ચઢાવનો ઉલ્લેખ કરતા કહ્યું કે,”ક્યારેક તમારે કંઈક ઠીક કરવા માટે દવા લેવી પડે છે.” તેમણે કહ્યું કે, તેઓ આ સપ્તાહની રજામાં વિશ્વના નેતાઓ સાથે સંપર્કમાં હતા. તેમણે દાવો કર્યો કે, ઘણા દેશો એક કરાર કરવા માંગે છે.
વૈશ્વિક બજારોમાં ભારે નુકસાન છતાં, ટ્રમ્પ વહીવટીતંત્રે તેની આક્રમક ટેરિફ વ્યૂહરચનાથી પીછેહઠ કરવાના કોઈ સંકેતો દર્શાવ્યા નથી. મીડિયા રિપોર્ટ્સ અનુસાર, ટ્રમ્પે કહ્યું કે, “બજારોનું શું થશે તે હું તમને કહી શકતો નથી. પરંતુ આપણો દેશ ઘણો મજબૂત છે.” આ દરમિયાન, ટ્રમ્પના ટેરિફના જવાબમાં ચીને નોંધપાત્ર રીતે બદલો લેવાના પગલાંની જાહેરાત કરી છે, જેનાથી વેપાર યુદ્ધ વધવાની ચિંતાઓ વધુ વધી ગઈ છે. અર્થશાસ્ત્રીઓએ ચેતવણી આપી હતી કે જો અમેરિકા તેના વર્તમાન માર્ગ પર ચાલતું રહેશે તો વૈશ્વિક અર્થતંત્રને ગંભીર મંદીનો સામનો કરવો પડી શકે છે. જેપી મોર્ગનના મુખ્ય અર્થશાસ્ત્રી બ્રુસ કાસમેને મંદીના જોખમને 60 ટકા ગણાવ્યું છે. નિષ્ણાતો બજારોમાં ઉથલપાથલની તુલના 1987ના ‘બ્લેક મન્ડે’ ક્રેશ સાથે કરી રહ્યા છે, જ્યારે વૈશ્વિક બજારોએ એક જ દિવસમાં $1.71 ટ્રિલિયન ગુમાવ્યા હતા.
CNBCના જીમ ક્રેમરે ચેતવણી આપી હતી કે, જો ડોનાલ્ડ ટ્રમ્પની વેપાર નીતિઓ આ રીતે ચાલતી રહેશે તો બજારો પણ આવી જ વિનાશક ઘટનાનો સામનો કરશે. બજારો બીજા એક અસ્થિર સપ્તાહ માટે તૈયાર થઈ રહ્યા છે, ત્યારે બધાની નજર વ્હાઇટ હાઉસ અને ચાલુ વેપાર સંઘર્ષના આગામી પગલાં પર છે.
