ઉત્તરપ્રદેશમાં હથિયાર બનાવવાનું કારખાનુ ઝડપાયું, મોટી સંખ્યામાં ગન અને કારતુસ જપ્ત કરાયાં
લખનૌઃ ઉત્તર પ્રદેશની રાજધાની લખનૌના મલીહાબાદના મિર્ઝાગંજમાં પોલીસે હાકીમ નામના શખ્સના ઘરે દરોડો પાડ્યો હતો. પોલીસે અહીંથી મોટી માત્રામાં હથિયારો, કારતૂસ, ગનપાઉડર જપ્ત કર્યા છે. સૂત્રોના જણાવ્યા અનુસાર, આ મામલે સલાઉદ્દીન ઉર્ફે લાલાને કસ્ટડીમાં લેવામાં આવ્યો છે અને પૂછપરછ ચાલી રહી છે. પોલીસે ગઈકાલે રાત્રે ઘરમાં હાજર પરિવારના 3 અન્ય લોકોની પણ પૂછપરછ કરી હતી.
સૂત્રોના જણાવ્યા અનુસાર, ઘરમાંથી DBBL રાઇફલ, પિસ્તોલ, 312 અને 315 બોરના હથિયારો મળી આવ્યા છે. દરોડા દરમિયાન, ઘરમાંથી હથિયારો બનાવવાના સાધનો અને શંકાસ્પદ પ્રવૃત્તિઓના પુરાવા પણ મળી આવ્યા છે. સૂત્રોના જણાવ્યા અનુસાર, બારાસિંગાની ચામડી અને કેટલીક વિસ્ફોટક સામગ્રી પણ મળી આવી છે. દરોડામાં પોલીસે 500 મીટરનો વિસ્તાર સીલ કરી દીધો હતો. પોલીસ કોલ ડિટેલ્સ અને અન્ય છુપાવાના સ્થળોની પણ તપાસ કરી રહી છે. ઘરમાંથી એક લેપટોપ પણ મળી આવ્યું છે, જેની પણ તપાસ ચાલી રહી છે.
પોલીસ દ્વારા દાખલ કરાયેલી FIRમાં જણાવ્યા અનુસાર કે, બાતમી મળી હતી કે, ભૂતપૂર્વ પિક્ચર હોલ પાસે એક વ્યક્તિ ગેરકાયદેસર હથિયારો બનાવે છે અને તેને બહાર વેચે છે અને કારતૂસ પણ રાખે છે.
પોલીસે જણાવ્યું હતું કે તપાસ દરમિયાન, એક બોરીમાં 07 એર ગન અને એક રાઇફલ .22 બોર અને એક બેગમાં 04 અર્ધ-નિર્મિત બટ્સ અને શસ્ત્રો બનાવવાના સાધનો અને સામગ્રી અને અન્ય બેગમાં 06 લાકડીઓ, 02 છરીઓ, 01 કરવત અને એક બેગમાંથી એક દેશી બનાવટની પિસ્તોલ 315 બોર, 03 પિસ્તોલ અને 02 દેશી બનાવટની પિસ્તોલ મળી આવી હતી. આ ઉપરાંત મોટી સંખ્યામાં કારતુસ મળી આવ્યાં હતા.
