સોનાની દાણચોરી કેસમાં રાન્યા રાવના સાથે સંકળયેલા વેપારીની ધરપકડ
બેંગ્લોરઃ રાન્યા રાવ સાથે સંકળાયેલા સોનાની દાણચોરીના કેસમાં DRI એ ત્રીજા વ્યક્તિની ધરપકડ કરી છે. માહિતી અનુસાર, કન્નડ અભિનેત્રી હર્ષવર્ધી રાન્યા ઉર્ફે રાન્યા રાવને દાણચોરી કરેલા સોનાના નિકાલમાં મદદ કરવા બદલ એક વેપારીની ધરપકડ કરવામાં આવી છે. આ કેસ સાથે સંકળાયેલા અધિકારીએ જણાવ્યું કે ડીલર સાહિલ જૈન બેલ્લારીનો રહેવાસી છે. તેમની પૂછપરછ કરવામાં આવી હતી, ત્યારબાદ ડિરેક્ટોરેટ ઓફ રેવન્યુ ઇન્ટેલિજન્સ દ્વારા તેમની ધરપકડ કરવામાં આવી હતી.
સૂત્રોના જણાવ્યા અનુસાર, સાહિલ જૈન પર દાણચોરી કરેલા સોનાનો નિકાલ કરવામાં અને તેના વેચાણમાંથી મળેલી રકમ વહેંચવામાં રાન્યા રાવને મદદ કરવાનો અને પ્રોત્સાહન આપવાનો આરોપ છે. ૩ માર્ચે દુબઈથી કેમ્પેગૌડા આંતરરાષ્ટ્રીય એરપોર્ટ પર પહોંચેલી ડીજીપી-રેન્કના અધિકારી કે રામચંદ્ર રાવની સાવકી પુત્રી રાન્યા પાસેથી 12.56 કરોડ રૂપિયાના સોનાના લગડીઓ જપ્ત કરવામાં આવી હતી. ત્યારબાદ, તેમના નિવાસસ્થાને તપાસ હાથ ધરવામાં આવી, જ્યાં અધિકારીઓએ 2.06 કરોડ રૂપિયાના સોનાના દાગીના અને 2.67 કરોડ રૂપિયાની ભારતીય ચલણ જપ્ત કર્યું હતું. આ કેસમાં રાન્યા રાવ અને હોટેલિયર તરુણ રાજુની પહેલાથી જ ધરપકડ કરવામાં આવી છે.
સૂત્રોના જણાવ્યા અનુસાર, રાન્યા એક વર્ષમાં લગભગ 30 વખત દુબઈ ગઈ હતી. એક કિલો સોનાની દાણચોરી કરવા બદલ તેને 1 લાખ રૂપિયા મળતા હતા. તે દુબઈની એક મુલાકાતમાં લગભગ 13 લાખ રૂપિયા કમાતી હતી. તેણીએ દાણચોરી માટે મોડિફાઇડ જેકેટ્સ અને ખાસ બેલ્ટનો ઉપયોગ કર્યો હતો. ડીઆરઆઈ ટીમે રાન્યાના લવેલ રોડ સ્થિત ઘરની તપાસ કરી હતી.
