જામનગર, 3 એપ્રિલ 2026: Caught taking bribe રાજ્યમાં લાંચ-રૂશ્વતના બનાવો વધતા જાય છે. ત્યારે વધુ એક બનાવમાં જામનગરમાં સેન્ટ્રલ પબ્લિક વર્ક ડિપાર્ટમેન્ટ (CPWD) ના ક્લાસ-2 અધિકારી રૂપિયા 4.52 લાખની લાંચ લેતા રંગેહાથ પકડાયા છે. એન્ટી કરપ્શન બ્યુરોએ સેન્ટ્રલ પબ્લિક વર્ક ડિપાર્ટમેન્ટ (CPWD) ના ક્લાસ-2 અધિકારીને લાખોની લાંચ લેતા ઝડપી પાડ્યા છે. આયુર્વેદ યુનિવર્સિટી કેમ્પસમાં આવેલી કચેરીમાં જ એસીબીએ છટકું ગોઠવીને આ સફળ ટ્રેપ પાર પાડી હતી.
એસીબીના સૂત્રોના જણાવ્યા મુજબ ફરિયાદીના મિત્રને બે મહત્વના સ્થળોએ ઇલેક્ટ્રિક કામગીરીનો કોન્ટ્રાક્ટ મળ્યો હતો. જામનગર-લાખાબાવડ હાઇવે પર નિર્માણ પામી રહેલા WHO ના દવા રિસર્ચ સેન્ટર ખાતે ઇલેક્ટ્રિક કામગીરી. દેવભૂમિ દ્વારકાના મોજપ ગામે આવેલા BSF મરીન ટ્રેનિંગ સેન્ટર ખાતે ઇલેક્ટ્રિક ફિટિંગની કામગીરી કરી હતી. આ કામગીરીના બાકી રહેલા બિલો મંજૂર કરવાના બદલામાં CPWD ના ઇલેક્ટ્રિક શાખાના મદદનીશ ઇજનેર વિજયકુમાર બાબુલાલ મીનાએ લાંચની માંગણી કરી હતી. કોન્ટ્રાક્ટર લાંચ આપવા માંગતા ન હોવાથી, જાગૃત નાગરિક (ફરિયાદી) દ્વારા એસીબીનો સંપર્ક કરવામાં આવ્યો હતો.
ફરિયાદના આધારે એસીબી રાજકોટ અને જામનગરની ટીમ દ્વારા ગઈકાલે તા. 02/04/2026 ના રોજ આયુર્વેદ યુનિવર્સિટી કેમ્પસમાં આવેલી CPWD ની કચેરીમાં છટકું ગોઠવવામાં આવ્યું હતું. આરોપી વિજયકુમાર મીનાએ પોતાની ચેમ્બરમાં જ ફરિયાદી સાથે વાતચીત કરી રૂા. 4,52,000/- ની માંગણી કરી હતી. જેવી લાંચની રકમ સ્વીકારવામાં આવી અને આરોપીએ ફોન પર લાંચ મળી ગઈ હોવાની કબૂલાત કરી, કે તુરંત જ એસીબીની ટીમે ત્રાટકીને તેને રંગેહાથ પકડી લીધો હતો. એસીબીની આ કડક કાર્યવાહીથી સરકારી કચેરીઓમાં ભ્રષ્ટાચાર આચરતા તત્વોમાં ફફડાટ વ્યાપી ગયો છે. અધિકારી સામે હાલ કાયદેસરની ગુનો નોંધી આગળની તપાસ હાથ ધરવામાં આવી છે.
