ચૂંટણી પંચે બિહારમાં ખાસ સઘન સુધારણા પ્રક્રિયા પછી પ્રથમ સુધારેલી મતદાર યાદીનો ડ્રાફ્ટ જાહેર કર્યો
નવી દિલ્હીઃ ચૂંટણી પંચે શુક્રવારે બિહારમાં ખાસ સઘન સુધારણા (SIR) પ્રક્રિયા પછી પ્રથમ સુધારેલી મતદાર યાદીનો ડ્રાફ્ટ જાહેર કર્યો છે. ગુરુવારે બિહારના 38 જિલ્લા મેજિસ્ટ્રેટે 243 વિધાનસભા મતવિસ્તારોના 90,817 મતદાન મથકો માટે તૈયાર કરાયેલ ડ્રાફ્ટ મતદાર યાદીને માન્યતા પ્રાપ્ત રાજકીય પક્ષો સાથે શેર કરવાનું શરૂ કર્યું.
ચૂંટણી વિભાગના એક વરિષ્ઠ અધિકારીએ જણાવ્યું હતું કે, ડ્રાફ્ટ સત્તાવાર વેબસાઇટ પર પણ પ્રકાશિત કરવામાં આવશે, જેથી સામાન્ય લોકો તેને જોઈ શકે અને સૂચનો અથવા વાંધા નોંધાવી શકે. આ પ્રક્રિયાનો હેતુ ચૂંટણીમાં પારદર્શિતા સુનિશ્ચિત કરવાનો અને દરેક પાત્ર મતદારને તેના અધિકારો આપવાનો છે. જિલ્લા મેજિસ્ટ્રેટને સ્થાનિક સ્તરે રાજકીય પક્ષો સાથે બેઠકો યોજવા અને ડ્રાફ્ટ પર ચર્ચા કરવા સૂચના આપવામાં આવી છે.
ડ્રાફ્ટ પ્રકાશિત થયા પછી, એક વિગતવાર પ્રેસ નોટ જારી કરવામાં આવશે. જેમાં પ્રક્રિયાના આગળના પગલાં અને સમયરેખા વિશે માહિતી હશે. ચૂંટણી પંચે એમ પણ કહ્યું છે કે, દરેક જિલ્લામાં હેલ્પલાઇન નંબર અને મદદ કેન્દ્રો સક્રિય રહે, જેથી મતદારોને કોઈપણ પ્રકારની સમસ્યાનો સામનો ન કરવો પડે.
છેલ્લા કેટલાક મહિનામાં બિહારમાં મતદાર જાગૃતિ અભિયાન પણ તીવ્ર બનાવવામાં આવ્યું હતું, જેમાં ગ્રામીણ અને શહેરી વિસ્તારોમાં શિબિરોનું આયોજન કરવામાં આવ્યું હતું. આ શિબિરો દ્વારા લોકોને મતદાર યાદીમાં નામ ઉમેરવા, કાઢી નાખવા અથવા સુધારવાની પ્રક્રિયા વિશે માહિતી આપવામાં આવી હતી.
ભારતના મુખ્ય ચૂંટણી કમિશનર જ્ઞાનેશ કુમારે ગુરુવારે (31 જુલાઈ) આ માહિતી આપી હતી. તેમણે કહ્યું, “બિહારના મતદારો, બિહારની ડ્રાફ્ટ મતદાર યાદી શુક્રવાર એટલે કે 1 ઓગસ્ટ 2025ના રોજ પ્રકાશિત કરવામાં આવશે. ચૂંટણી પંચની સત્તાવાર વેબસાઇટની મુલાકાત લઈને પણ તે ચકાસી શકાય છે.”
તેમણે ખાતરી આપી હતી કે, બિહારના મુખ્ય ચૂંટણી અધિકારી (CEO) અને 243 ચૂંટણી નોંધણી અધિકારીઓ (EROs) તે વિધાનસભા મતવિસ્તારના કોઈપણ મતદાર અથવા બિહારના કોઈપણ માન્ય રાજકીય પક્ષને 1 ઓગસ્ટથી 1 સપ્ટેમ્બર, 2025 સુધી કોઈપણ બાકી રહેલા પાત્ર મતદારનું નામ ઉમેરવા, કોઈપણ અયોગ્ય મતદારનું નામ કાઢી નાખવા અથવા ડ્રાફ્ટ મતદાર યાદીમાં કોઈપણ એન્ટ્રી સુધારવા માટે દાવા અને વાંધા આપવા માટે આમંત્રિત કરશે.
