દેશમાં વાયુ પ્રદૂષણની સમસ્યા ઘટાડવા ઇલેક્ટ્રિક વાહનો શ્રેષ્ઠ વિકલ્પ: નીતિન ગડકરી
મુંબઈઃ કેન્દ્રીય માર્ગ પરિવહન અને રાજમાર્ગ મંત્રી નીતિન ગડકરીએ કહ્યું કે, દેશમાં વાયુ પ્રદૂષણની સમસ્યા ઘટાડવા ઇલેક્ટ્રિક વાહનો શ્રેષ્ઠ વિકલ્પ છે. નીતિન ગડકરીએ મહારાષ્ટ્રના થાણેમાં લેબ ઇન્ડિયા દ્વારા ઇ-સાયકલનું ઉદ્ઘાટન કર્યું હતું. તેમણે કહ્યું કે, દેશમાં વાયુ પ્રદૂષણ એક મોટી સમસ્યા છે, પરંતુ કેન્દ્ર સરકારે આ સમસ્યાના ઉકેલની જવાબદારી લીધી છે. નીતિન ગડકરીએ વિશ્વાસ વ્યક્ત કર્યો કે, ભારત વર્ષ 2030 સુધીમાં ઇલેક્ટ્રિક વાહનોના ઉત્પાદનમાં ટોચ પર પહોંચી જશે. તેમણે કહ્યું, આગામી સમયમાં પેટ્રોલ, ડીઝલ અને ઇલેક્ટ્રિક કારના ભાવ સમાન રહેશે.
દરમિયાન મહારાષ્ટ્ર સરકારે ૩૦ લાખ રૂપિયાથી વધુ કિંમતના પ્રીમિયમ ઇલેક્ટ્રિક વાહનો પર 6 ટકા ટેક્સ લાદવાની યોજના પડતી મૂકી છે. મુખ્યમંત્રી દેવેન્દ્ર ફડણવીસે વિધાન પરિષદમાં જાહેરાત કરી હતી કે રાજ્ય સરકાર આ પ્રસ્તાવનો અમલ કરશે નહીં. તેમણે કહ્યું કે આવા કરથી ન તો વધારે આવક થશે અને ન તો સરકારની ઇલેક્ટ્રિક વાહન નીતિને યોગ્ય દિશામાં લઈ જવામાં આવશે. તેથી, તેને પાછું ખેંચવાનો નિર્ણય લેવામાં આવ્યો છે.
થોડા દિવસો પહેલા જ, મહારાષ્ટ્ર સરકારે તેના 2025-26ના બજેટમાં 30 લાખ રૂપિયાથી વધુ કિંમતના ઇલેક્ટ્રિક વાહનો પર 6 ટકા ટેક્સનો પ્રસ્તાવ મૂક્યો હતો. આ નિર્ણયથી ઓટોમોબાઈલ ઉદ્યોગ અને ઈવી ખરીદવાનું વિચારી રહેલા લોકોમાં ચિંતા વધી ગઈ હતી. સરકારનો ઉદ્દેશ્ય આ કર દ્વારા આવક વધારવાનો હતો. પરંતુ આ નીતિ કેન્દ્ર સરકારની ઇલેક્ટ્રિક વાહનોને પ્રોત્સાહન આપવાની યોજનાઓની વિરુદ્ધ જઈ રહી હતી. સરકારને ખ્યાલ આવ્યો કે આ પગલું પર્યાવરણને સ્વચ્છ રાખવા અને સ્વચ્છ પરિવહનને પ્રોત્સાહન આપવાના ધ્યેયની વિરુદ્ધ છે, તેથી તેને રદ કરવામાં આવ્યું.
