અમદાવાદ, 05 માર્ચ 2026: Fire in three factories manufacturing sev શહેરના કાલુપુર ઓવરબ્રિજ નજીક સરસપુર ઇંટવાડામાં સેવ બનાવવાની ત્રણ ફેક્ટરીઓમાં આગ લાગતા અફડાતફડી મચી ગઈ હતી. આગ લાગ્યાની જાણ થતાં જ આજુબાજુના લોકો દોડી આવ્યા હતા અને ફાયરબ્રિગેડને કોલ કરતા ફાયર બ્રિગેડની ગોમતીપુર, પાંચકુવા અને નરોડા સહિતના ફાયર સ્ટેશનની 16 ગાડીઓ ઘટના સ્થળે દોડી આવી હતી. ફેકટરીમાં રહેલા જ્વલનશીલ પદાર્થો અને તેલના કારણે આગએ જોતજોતામાં વિકરાળ સ્વરૂપ ધારણ કરી લીધું હતું. ફાયર બ્રિગેડના જવાનોએ સતત પાણીનો મારો ચલાવીને 5 કલાકે આગને કાબુમાં લીધી હતી.
આ બનાવની વિગત એવી છે કે, શહેરના કાળુપુર ઓવરબ્રિજ નજીક સરસપુર ઈંટવાડામાં આજુબાજુમાં સેવ બનાવવાની ત્રણ ફેટકરીઓ આવેલી છે. ગઈ મધરાત બાદ સેવ બનાવવાની એક ફેટકરીમાં લાગેલી આગે આજુબાજુની બન્ને ફેટકરીને લપેટમાં લીધી હતી. ફેકટરીમાં રહેલા જ્વલનશીલ પદાર્થો અને તેલના કારણે આગએ જોતજોતામાં વિકરાળ સ્વરૂપ ધારણ કરી લીધું હતું. ફેક્ટરીઓની પાછળના ભાગે મન્સૂરીની ચાલી આવેલી છે. તેથી આગ ચાલી સુધી ન પ્રસરે તે માટે ફાયર બ્રિગેડની ટીમ દ્વારા ચાલી બાજુથી પાણીનો મારો ચલાવવામાં આવ્યો હતો જેથી આગ ચાલીઓ સુધી પહોંચી નહોતી. જો કે, આગ લાગતા ઉપર સૂતેલા બે લોકો બચવા જતા નીચે કૂદ્યા હતા જેથી બન્ને ઈજાગ્રસ્ત થતા સારવાર માટે હોસ્પિટલ ખસેડવામાં આવ્યા હતા.
ફાયરબ્રિગેડના સૂત્રના કહેવા મુજબ, શહેરના કાલુપુર ઓવરબ્રિજ પાસે સરસપુરના ઇંટવાડામાં ગળી સેવ બનાવવાનું કારખાનું આવેલું છે. ગત મધરાત બાદ રાત્રે 3:00 વાગ્યાની આસપાસ ફાયર બ્રિગેડ કંટ્રોલ રૂમને મેસેજ મળ્યો હતો કે, સેવ બનાવવાના કારખાનામાં આગ લાગવાની ઘટના બની છે. જેથી પાંચકુવા અને નરોડા ફાયર સ્ટેશનની ગાડીઓ ઘટના સ્થળ ઉપર રવાના કરવામાં આવી હતી. ફાયર બ્રિગેડની ગાડીઓ ઘટના સ્થળ પર પહોંચી ત્યારે ત્રણ જેટલી ફેક્ટરીમાં લાગેલી આગે વિકરાળ સ્વરૂપ ધારણ કરી લીધું હતું અને આખા કારખાનામાં આગ ફેલાઈ ગઈ હતી. કારખાનાની પાછળના ભાગે એક જ દીવાલે ચાલી આવેલી હતી જેમાં 50થી વધારે મકાનો હતા. ફાયર બ્રિગેડની ટીમ દ્વારા ચાલીના મકાનો બાજુથી પાણીનો મારો ચલાવી આગને કાબુમાં લેવાના પ્રયાસ શરૂ કરવામાં આવ્યા હતા. આગ ખૂબ જ વિકરાળ હતી જેના કારણે આસપાસની ઓરડીઓમાં ફેલાઈ જતા 108 એમ્બ્યુલન્સને પણ જાણ કરવામાં આવી હતી, તેમજ બીજી ફાયરબ્રિગેડ ગાડીઓ પણ બોલાવવામાં આવી હતી. મણિનગર અને થલતેજ ફાયર સ્ટેશનના અધિકારી અને કર્મચારી પણ ઘટના સ્થળ પર પહોંચ્યા હતા. ફાયર બ્રિગેડની ટીમ દ્વારા સતત પાણીનો મારો ચલાવી સવારે 7:30 વાગ્યે આગને સંપૂર્ણ પણે કાબૂમાં લઈ લેવામાં આવી હતી.
