અમદાવાદ,13 જાન્યુઆરી 2026: ગુજરાતભરમાં છેલ્લા બે-ચાર દિવસથી ઠંડીમાં વધારો થતાં જનજીવન પર અસર પડી છે. ટાઢાબોળ પવનોએ લોકોને ધ્રૂજાવી દીધા છે. આજે પણ નલિયામાં 6 ડિગ્રી, ભૂજમાં 9 અને કંડલામાં 8 ડિગ્રી લઘુત્તમ તાપમાન નોંધાયું હતું. જ્યારે અમરેલી અને રાજકોટમાં 10 ડિગ્રી તાપમાન નોંધાતા લોકોએ કડકડતી ઠંડીનો અનુભવ કર્યો હતો. દરમિયાન હવામાન વિભાગની આગાહી મુજબ આગામી 24 કલાક બાદ ફરી એકવાર તાપમાનમાં 2થી 3 ડિગ્રી સેલ્સિયસનો ઘટાડો થવાની શક્યતા છે. જેના કારણે ઉત્તરાયણ અને વાસી ઉત્તરાયણના દિવસે રાજ્યમાં ફરી ઠંડીનો ચમકારો અનુભવાઈ શકે છે.
ગુજરાતમાં ઉત્તર-પૂર્વના ઠંડા પવનોને લીધે તાપમાનમાં ઘટાડો થયો છે. હાલમાં નીચલા સ્તરે ઉત્તર-પૂર્વથી પૂર્વ દિશાના પવનો ફુંકાય રહ્યા છે. જોકે સૌરાષ્ટ્ર-કચ્છ અને ઉત્તર ગુજરાતના કેટલાક વિસ્તારોમાં લઘુત્તમ તાપમાનમાં સામાન્ય વધારો નોંધાયો છે, જ્યારે રાજ્યના અન્ય વિસ્તારોમાં તાપમાનમાં કોઈ મોટો ફેરફાર જોવા મળ્યો નથી. સામાન્ય તાપમાનની તુલનામાં કચ્છના કેટલાક ભાગોમાં લઘુત્તમ તાપમાન નોંધપાત્ર રીતે નીચું રહ્યું છે, જ્યારે સૌરાષ્ટ્રના કેટલાક ભાગોમાં તે સામાન્ય કરતાં ઓછું નોંધાયું છે. બીજી તરફ દરિયાકાંઠાના સૌરાષ્ટ્ર અને ઉત્તર ગુજરાતના કેટલાક વિસ્તારોમાં તાપમાન સામાન્ય કરતાં વધુ નોંધાયું છે.
હવામાન વિભાગની આગાહી મુજબ આગામી 24 કલાક દરમિયાન લઘુત્તમ તાપમાનમાં 2થી 3 ડિગ્રીનો ઘટાડો થશે. ત્યારબાદના બે દિવસ દરમિયાન ફરી 2થી 3 ડિગ્રી સુધી તાપમાન ઘટી શકે છે, જેના કારણે રાજ્યમાં ફરી ઠંડીનું પ્રમાણ વધશે. ત્યારબાદ લઘુત્તમ તાપમાનમાં કોઈ મોટો ફેરફાર થવાની શક્યતા નથી. અમદાવાદમાં લઘુત્તમ તાપમાન આશરે 16 ડિગ્રી સેલ્સિયસ રહેવાની શક્યતા છે. આજે અમદાવાદ શહેરમાં મહત્તમ તાપમાન 27 ડિગ્રી સેલ્સિયસ નોંધાયું હતું, જ્યારે લઘુત્તમ તાપમાન 15 ડિગ્રી નોંધાયું હતું.
