ભારત 7 ટ્રિલિયન ડોલરની અર્થવ્યવસ્થા બનવાની નજીક, ટેકનોલોજી નવીનતામાં ક્રાંતિ લાવશે
ભારત 2030 સુધીમાં 7 ટ્રિલિયન ડોલરની અર્થવ્યવસ્થા બનવા તરફ ઝડપથી આગળ વધી રહ્યું છે. આ લક્ષ્યને હાંસલ કરવામાં ટેક્નોલોજી ક્ષેત્ર મહત્ત્વની ભૂમિકા ભજવશે, જે 2030 સુધીમાં GDPમાં લગભગ $1,000 બિલિયનનું યોગદાન આપી શકે છે. આનાથી ઈનોવેશનને પ્રોત્સાહન મળશે, જે માત્ર ભારતીય જ નહીં પરંતુ વૈશ્વિક સમસ્યાઓને ઉકેલવામાં સક્ષમ હશે. નાસ્કોમના ચેરમેન રાજેશ નામ્બિયારે જણાવ્યું હતું કે, ભારતના ભવિષ્યને ઘડવામાં ટેક્નોલોજી મુખ્ય ભૂમિકા ભજવશે. દેશને સાત ટ્રિલિયન ડોલરની જીડીપી હાંસલ કરવા માટે, ટેક્નોલોજી ક્ષેત્રે નવીનતા અને ખાસ કરીને ડીપ ટેક દ્વારા નેતૃત્વ કરવું પડશે. તે આરોગ્ય અને નાણાકીય સેવાઓ જેવા વિવિધ ક્ષેત્રોમાં નોંધપાત્ર ફેરફારો લાવવામાં પણ મદદરૂપ થશે.
સ્ટાર્ટઅપ મહાકુંભ નામ્બિયારનું નિવેદન
ગુરુવારે સ્ટાર્ટઅપ મહાકુંભના ઉદ્ઘાટન સમયે બોલતા, નામ્બિયારે જણાવ્યું હતું કે 2047 સુધીમાં વિકસિત ભારત બનવાનું વિઝન માત્ર આર્થિક વૃદ્ધિ દ્વારા જ નહીં પરંતુ તકનીકી નવીનતા દ્વારા પણ આકાર પામશે. નવી દિલ્હીમાં 3 થી 5 એપ્રિલ દરમિયાન આયોજિત સ્ટાર્ટઅપ મહાકુંભમાં 50 થી વધુ દેશોના સ્ટાર્ટઅપ, રોકાણકારો અને ઉદ્યોગ અગ્રણીઓ ભાગ લઈ રહ્યા છે.
વૈશ્વિક સ્ટાર્ટઅપ ઇકોસિસ્ટમમાં ભારત મજબૂત છે
NASSCOM પ્રમુખે કહ્યું, વૈશ્વિક સ્ટાર્ટઅપ પરિદ્રશ્યમાં ભારતની સ્થિતિ મજબૂત છે. દેશ વિશ્વનું ત્રીજું સૌથી મોટું સ્ટાર્ટઅપ હબ બની ગયું છે, જે લગભગ 35,000 સ્ટાર્ટઅપ્સનું ઘર છે. ભારતે ગયા વર્ષે વૈશ્વિક સ્તરે બીજા નંબરની સૌથી મોટી સંખ્યામાં યુનિકોર્ન (એક અબજ ડોલરથી વધુના મૂલ્ય સાથેના સ્ટાર્ટઅપ) બનાવ્યા છે.
2023ની સરખામણીએ 2024માં ટેક સ્ટાર્ટઅપ્સના IPOની સંખ્યામાં ત્રણ ગણો વધારો થવાથી આ ગતિ વધુ મજબૂત થશે.
ટેક્નોલોજી ક્ષેત્રે 2024 સુધીમાં દેશની અર્થવ્યવસ્થામાં $283 બિલિયન (GDPના 7.3 ટકા) નું નોંધપાત્ર યોગદાન આપ્યું છે.
