અમેરિકી પ્રમુખ ડોનાલ્ડ ટ્રમ્પે સોશિયલ મીડિયામાં લખ્યું કે, મેં જે ‘સોદો’ કરવા કહ્યું હતું તેના પર ઈરાને હસ્તાક્ષર કરવા જોઈતા હતા. મને માનવ જાનહાનિનો દુ:ખ છે. ઇઝરાયલ અને ઈરાનના વધી રહેલા તણાવ વચ્ચે, અમેરિકી પ્રમુખ ડોનાલ્ડ ટ્રમ્પે ઈરાનને ચેતવણી આપી છે. ઈરાનને પરમાણુ શસ્ત્રો બનાવવાનું બંધ કરવાની ચેતવણી આપતાં ટ્રમ્પે સ્પષ્ટપણે કહ્યું કે, તેહરાનના લોકોએ તાત્કાલિક શહેર ખાલી કરી દેવું જોઈએ.
ટ્રમ્પે સોશિયલ મીડિયા પ્લેટફોર્મ ‘ટ્રુથ’ પર લખ્યું કે, “મેં જે ‘સોદો’ કરવા કહ્યું હતું તેના પર ઈરાને હસ્તાક્ષર કરવા જોઈતા હતા. મને માનવ જાનહાનિનો દુ:ખ છે. હું સ્પષ્ટપણે કહું છું કે ઈરાનને પરમાણુ શસ્ત્રો મેળવવા દેવામાં આવશે નહીં. મેં આ વારંવાર કહ્યું છે. દરેક વ્યક્તિએ તાત્કાલિક તેહરાન ખાલી કરી દેવું જોઈએ.” ડોનાલ્ડ ટ્રમ્પનું આ નિવેદન ઇઝરાયલ અને ઈરાન વચ્ચે વધી રહેલા તણાવ વચ્ચે આવ્યું છે, જેના કારણે માત્ર ઈરાનમાં જ નહીં પરંતુ વૈશ્વિક નેતાઓમાં પણ ગભરાટ ફેલાયો છે. અમેરિકા 2018માં ઈરાન સાથેના જોઈન્ટ કોમ્પ્રીહેન્સિવ પ્લાન ઓફ એક્શન (GCPOA)માંથી પહેલાથી જ ખસી ગયું હતું. આ કરાર હેઠળ, એવું નક્કી કરવામાં આવ્યું હતું કે ઈરાન લશ્કરી હેતુઓ માટે પરમાણુ શસ્ત્રો વિકસાવશે નહીં.
જોકે ઈરાન હંમેશા કહેતું આવ્યું છે કે, તે નાગરિક હિત માટે ન્યુક્લિયર પ્રોગ્રામ ચલાવી રહ્યું છે, પરંતુ અમેરિકા અને ઈઝરાયલને આ અંગે શંકા છે. આ શંકાને કારણે, અમેરિકાએ ઈરાન સાથે GCPOA તોડી નાખ્યો છે. વ્હાઇટ હાઉસે જાહેરાત કરી છે કે, યુએસ પ્રમુખ ડોનાલ્ડ ટ્રમ્પ “ઘણા મહત્ત્વપૂર્ણ મુદ્દાઓ” પર ધ્યાન કેન્દ્રિત કરવા માટે કેનેડામાં G7 સમિટ વહેલા છોડી રહ્યા છે. ટ્રમ્પ મંગળવાર મોડી રાત સુધી કેનેડામાં રહેવાની યોજના બનાવી રહ્યા હતા. ટ્રમ્પ આ માટે રવિવારે કેનેડા પહોંચ્યા હતા. G7 સમિટ 17 જૂને સમાપ્ત થવા જઈ રહી છે.
અગાઉ, ડોનાલ્ડ ટ્રમ્પે કહ્યું હતું કે તેઓ ઇઝરાયલ અને ઈરાનને વાટાઘાટોનો દોર પર લાવી શકે છે. ઇઝરાયલ અને ઈરાન વચ્ચે ચાલી રહેલા સંઘર્ષમાં, બંને દેશો એકબીજા પર ડ્રોન અને મિસાઇલોથી હુમલો કરી રહ્યા છે, જેમાં ઘણા લોકોના મોતની પુષ્ટિ થઈ છે.
