- પોલીસે 559 કિલો લીલા ગાંજાના 180 છોડ સાથે એક આરોપીની ધરપકડ કરી,
- ખેતરમાં ગાંજાના છોડ ઉખેડવા માટે એક ડઝન GRD જવાનની મદદ લેવી પડી,
- ગાંજાની કિમત આશરે 2,79,85,000 રૂપિયા આંકવામાં આવી
સુરેન્દ્રનગરઃ જિલ્લાના સાયલા તાલુકાના ખીટલા ગામની સીમમાં પોલીસે કપાસની આડમાં ગાંજાનું વાવેતર પકડી પાડ્યુ છે. જિલ્લાની એસઓજી પોલીસે બાતમીને આધારે ખીટલાં ગામની સીમમાં રેડ પાડીને પોણાત્રણ કરોડની કિંમતના ગાંજાના છોડ જપ્ત કર્યા છે. ગાંજાનો મદ્દામાલ કબજે કરવા કોથળા પણ ખૂટી પડ્યા હતા. પોલીસે 559 કિલો વજનના લીલા ગાંજાના 180 છોડ સાથે એક આરોપીની ધરપકડ કરી છે.
સુરેન્દ્રનગર જિલ્લામાં SOG (સ્પેશિયલ ઓપરેશન ગ્રુપ)ની ટીમે બાતમીના આધારે સાયલા તાલુકાના ખીટલા ગામની સીમમાં દરોડા પાડ્યા હતા, જ્યાં કપાસના વાવેતરની આડમાં ગાંજાનું વાવેતર ઝડપી પાડ્યું હતું. પોલીસે સતત 19 કલાક સુધી રેડની કાર્યવાહી કરી હતી. ખેતરમાં ગાંજાના છોડ ઉખેડવા માટે એક ડઝન GRD જવાનની મદદ લેવામાં આવી હતી. જે ગ્રામ્ય વિસ્તારના હોય અને ખેતીકામથી માહિતગાર હોય તેવા જવાનોની મદદથી ગાંજાના તમામ છોડને ખેતરમાંથી ઉખેડી જપ્ત કરાયા હતા. ગાંજાના કેટલાક છોડમાં મધ પણ બેસી ગયું હોવાથી ગાંજાના છોડ ઉખેડવા મુશ્કેલ હતા. જેથી ધુમાડો કરી મધમાખીઓ ઉડાડીને ગાંજાના છોડ કબજે લેવામાં આવ્યા હતા. ગાંજાનો મુદ્દામાલને કબજે લેવા કોથળા ખૂટી પડ્યા હતા. 12 ફૂટ લાંબા ગાંજાના છોડ માટે સીલિંગ પેકિંગ કરવા પ્લાસ્ટિકના 15×20ના કંતાનનો ઉપયોગ કરવો પડ્યો હતો. એક આખું ટ્રેક્ટર ભરીને તમામ જથ્થો લઈ જવાયો હતો.
પોલીસ સૂત્રોના કહેવા મુજબ એસઓજી પીએસઆઈ આર.જે. ગોહિલને બાતમી મળી હતી કે સાયલા તાલુકાના ખીટલા ગામના રાજુ ખવડે પોતાની વાડીમાં કપાસના વાવેતરની આડમાં ગેરકાયદે રીતે લીલા ગાંજાનું વાવેતર કર્યું છે. આ બાતમીના આધારે એસઓજીની ટીમને દરોડા દરમિયાન વાડીમાંથી લીલા ગાંજાના 180 છોડ મળ્યા હતા, જેનું કુલ વજન 559 કિલો 700 ગ્રામ હતું, જેની કિંમત આશરે 2,79,85,000 રૂપિયા આંકવામાં આવી છે. પોલીસે આ મુદ્દામાલ જપ્ત કરીને આરોપી રાજુ ખવડની ધરપકડ કરી હતી. આરોપી વિરુદ્ધ ધજાળા પોલીસ સ્ટેશનમાં એન.ડી.પી.એસ. એક્ટ હેઠળ ગુનો નોંધી કાયદેસરની કાર્યવાહી હાથ ધરવામાં આવી છે.
