હૈદરાબાદના કાંચા ગાચીબોવલી જંગલમાં હવે એક પણ વૃક્ષ ન કપાવું જોઈએ, સુપ્રીમ કોર્ટની સરકારને તાકીદ
નવી દિલ્હીઃ હૈદરાબાદના કાંચા ગાચીબોવલી જંગલમાં વૃક્ષોના આડેધડ કાપના મુદ્દા પર સુપ્રીમ કોર્ટે ચિંતા વ્યક્ત કરી છે. કોર્ટે કહ્યું કે અમારી પ્રાથમિકતા 100 એકર જંગલને પુનઃસ્થાપિત કરવાની છે. તેમણે એવી પણ સૂચના આપી હતી કે અહીં એક પણ વૃક્ષ કાપવામાં ન આવે. કોર્ટે તેલંગાણા સરકારને પરવાનગી વિના વૃક્ષો કાપવા બદલ પણ ફટકાર લગાવી હતી.
બુધવારે સુનાવણી દરમિયાન, સુપ્રીમ કોર્ટે વૃક્ષો કાપવાથી પર્યાવરણને થતા નુકસાન અંગે ચિંતા વ્યક્ત કરી હતી. કોર્ટે કહ્યું કે અમને કોઈ પણ બાબતમાં કોઈ સમસ્યા નથી, પરંતુ અમને ફક્ત પર્યાવરણને થતા નુકસાનની ચિંતા છે. કોર્ટે ચેતવણી આપી હતી કે, “કોઈપણ કાયદો જે સુપ્રીમ કોર્ટના આદેશોની વિરુદ્ધ હોય તે માન્ય રહેશે નહીં.” કોર્ટે કહ્યું કે અમે એક વખત સુકમા તળાવમાં એક મોટા રહેણાંક પ્રોજેક્ટનું બાંધકામ અટકાવી દીધું હતું.
કોર્ટે તેલંગાણા સરકારને કહ્યું, “અમને ફક્ત 100 એકર જંગલના વિનાશની ચિંતા છે. અમારી પ્રાથમિકતા આ 100 એકર જંગલને પુનઃસ્થાપિત કરવાની છે. અમે પર્યાવરણ અને જંગલના રક્ષણ માટે પરંપરાગત માર્ગથી આગળ વધીને પગલાં લઈશું.”
ઉપરાંત, સુપ્રીમ કોર્ટે તેલંગાણા રાજ્યને CEC રિપોર્ટ પર જવાબ દાખલ કરવા માટે 4 અઠવાડિયાનો સમય આપ્યો છે. આ ઉપરાંત, કોર્ટે રાજ્યના વાઇલ્ડલાઇફ વોર્ડનને 100 એકર જંગલ કાપવાથી પ્રભાવિત વન્યજીવોના રક્ષણ માટે તાત્કાલિક જરૂરી પગલાં લેવાનો નિર્દેશ આપ્યો છે. જસ્ટિસ બીઆર ગવઈએ કહ્યું કે આપણી પહેલી પ્રાથમિકતા યથાસ્થિતિ જાળવી રાખવાની હોવી જોઈએ અને આ સમયગાળા દરમિયાન ત્યાં એક પણ વૃક્ષ કાપવું જોઈએ નહીં.
