લાહોર: પાકિસ્તાનના પંજાબ પ્રાંતમાં હાલ ભારે ગરમી પડી રહી છે અને કેટલાક જિલ્લાઓમાં તાપમાન 50 ડિગ્રી સેલ્સિયસ સુધી પહોંચી ગયું છે. પાકિસ્તાન હવામાન વિભાગ (PMD)ના જણાવ્યા પ્રમાણે, આગામી 48 થી 72 કલાક સુધી ગરમીનો પ્રકોપ ચાલુ રહેવાની શક્યતા છે. પાકિસ્તાન હવામાન વિભાગે જણાવ્યું હતું કે મંગળવાર અને બુધવારે ભાકર, નુરપુર થલ, ગુજરાંવાલા, હાફિઝાબાદ, લૈયા અને મંડી બહાઉદ્દીનમાં 48 ડિગ્રી સેલ્સિયસથી 49 ડિગ્રી સેલ્સિયસ સુધીનું તાપમાન નોંધાયું હતું. લાહોરમાં બુધવારે ગરમીનો પારો 45 ડિગ્રી સેલ્સિયસ સુધી પહોંચ્યો હતો.
હવામાન વિભાગના અધિકારીઓએ જણાવ્યું હતું કે જે પરિસ્થિતિઓ જોવા મળી રહી છે તે વર્તમાન ગરમીના પ્રકોપનો ભાગ છે. હાલમાં, ભીષણ ગરમીથી રાહત મળવાની કોઈ આશા નથી, ગરમીનો પ્રકોપ 13 જૂન સુધી ચાલુ રહેવાની શક્યતા છે. પાકિસ્તાન હવામાન વિભાગના જણાવ્યા અનુસાર, સમગ્ર પ્રદેશમાં તાપમાન સામાન્ય કરતા 5-7 ડિગ્રી સેલ્સિયસ વધુ રહેશે. કાળઝાળ ગરમીને કારણે હોસ્પિટલમાં દર્દીઓની સંખ્યા પણ વધી રહી છે.
કાળઝાળ ગરમી વચ્ચે, પાકિસ્તાનની સ્થિતિ એવી છે કે સિંધુ બેસિનના બંધોમાંથી પાણીના પ્રવાહમાં ભારે ઘટાડો થયો છે. તીવ્ર ગરમી અને પાણીની અછતને કારણે, ખેતરોમાં પણ પહોળી તિરાડો પડી ગઈ છે. જળાશયોનું પાણીનું સ્તર ખતરનાક રીતે નીચા સ્તરે પહોંચી ગયું છે. માંગલા અને તરબેલા જેવા મુખ્ય બંધ સુકાઈ ગયા છે, જેના કારણે સિંચાઈ પર અસર પડી રહી છે અને ખરીફ પાકની વાવણી બંધ થવાનો ભય છે.
