સીરિયાઃ દરિયાકિનારા અને સ્વિમિંગ પુલમાં હવે મહિલાઓ માટે આખા શરીરને ઠાંકતા સ્વિમવેર ફરજિયાત કરાયાં
સીરિયાની વચગાળાની ઇસ્લામિક સરકારે જાહેર દરિયાકિનારા અને સ્વિમિંગ પુલ પર મહિલાઓ માટે બુર્કિની અથવા આખા શરીરને ઢાંકતા સ્વિમવેર ફરજિયાત બનાવ્યા છે. આ નિર્ણય સીરિયામાં બશર અલ-અસદના સરમુખત્યારશાહીના પતન પછી દેખાતા ધાર્મિક અને સાંસ્કૃતિક પરિવર્તન તરફ એક મોટું પગલું છે. પરંતુ ઇસ્લામિક દિશામાં આગળ વધતા સીરિયાએ સ્પષ્ટ સંકેત આપ્યો છે કે તે તુર્કી જેવા આધુનિક ઇસ્લામિક દેશોમાં પ્રચલિત હોવા છતાં પણ ઇસ્લામ વિરોધી સંસ્કૃતિ અપનાવશે નહીં. સીરિયાના પર્યટન મંત્રાલયે એક નવી ડ્રેસ કોડ માર્ગદર્શિકા જારી કરી છે.
નવી ડ્રેસ કોડ માર્ગદર્શિકા અનુસાર, મહિલાઓ ફક્ત બુર્કિની અથવા આખા શરીરને ઢાંકતા સ્વિમવેર પહેરી શકે છે, બીચ પર જતી વખતે તેમના માટે છૂટક ચાદર અથવા કફ્તાન પહેરવાનું ફરજિયાત રહેશે, પુરુષો માટે પૂલ વિસ્તારની બહાર શર્ટ પહેરવું જરૂરી છે, જાહેર સ્થળોએ ચુસ્ત, પારદર્શક અથવા ઘૂંટણથી ઉપરના કપડાં પહેરવા પર પ્રતિબંધ મૂકવામાં આવ્યો છે. જો કે, ફોર-સ્ટાર અથવા ઉપરની હોટલો અને ખાનગી બીચ પર બિકિની જેવા પશ્ચિમી શૈલીના સ્વિમવેરને મંજૂરી આપવામાં આવી છે.
આ ડ્રેસ કોડ પાછળની વિચારધારા સીરિયાની વચગાળાની ઇસ્લામિક સરકારની છે, જેનું નેતૃત્વ હયાત તહરિર અલ-શામ (HTS) કરે છે, જે પહેલા અલ-નુસરા ફ્રન્ટ તરીકે ઓળખાતું હતું અને જેને અમેરિકા અને બ્રિટન દ્વારા આતંકવાદી સંગઠન જાહેર કરવામાં આવ્યું છે. બશર અલ-અસદના શાસનને ઉથલાવી દીધા પછી આ જૂથ વચગાળાની સરકારમાં અગ્રણી બન્યું અને હવે તે શરિયા આધારિત બંધારણ લાગુ કરવા તરફ આગળ વધી રહ્યું છે.
નોંધનીય છે કે અહમદ અલ-શારા એ જ નેતા છે જેમને તુર્કીની વ્યૂહાત્મક મદદથી સત્તામાં લાવવામાં આવ્યા હતા. પરંતુ હવે તે જ નેતા તુર્કીના આધુનિક અને લવચીક ડ્રેસ કોડ મોડેલ સાથે મેળ ખાતા નથી, અને ઇસ્લામિક કઠોરતાના માર્ગ પર છે. પ્રવાસન મંત્રી માઝેન અલ-સલ્હાનીએ આ નિર્ણયને જાહેર હિતમાં ગણાવ્યો અને કહ્યું કે તે સામાજિક અને ધાર્મિક વિવિધતાનો આદર કરે છે.
બીજી બાજુ, જો આપણે તુર્કી વિશે વાત કરીએ, તો તેણે આધુનિક ઇસ્લામિક લોકશાહીની છબી જાળવી રાખી છે. ઇસ્તંબુલ, અંકારા અને ઇઝમીર જેવા શહેરોમાં, સ્ત્રીઓ સંપૂર્ણપણે પશ્ચિમી પહેરવેશ અપનાવે છે. અંતાલ્યા, બોડ્રમ જેવા દરિયાકાંઠાના શહેરોમાં, કપડાંની સ્વતંત્રતા યુરોપ જેવી છે. બુર્કિનીથી બિકિની સુધી, કોઈ પણ વસ્તુ પર કોઈ પ્રતિબંધ નથી. પરંતુ સીરિયાએ હવે તે દિશાથી અલગ રસ્તો અપનાવ્યો છે. HTS સરકાર તુર્કીના મધ્યમ ઇસ્લામિક મોડેલને નકારી રહી છે અને શુદ્ધ ઇસ્લામિક શિસ્ત તરફ આગળ વધી રહી છે. એટલે કે, જે નેતાને તુર્કી દ્વારા ટેકો આપવામાં આવ્યો હતો અને સત્તામાં લાવવામાં આવ્યો હતો તે હવે તુર્કીના ખુલ્લાપણાને ઇસ્લામ વિરોધી કહીને નકારી રહ્યો છે.
