અમદાવાદઃ ઓનલાઈન ખરીદીનો ક્રેઝ વધતો જાય છે. ક્યારેક ઓનલાઈન ખરીદીમાં વધુ પડતા વિશ્વાસને કારણે છેતરપિંડીનો ભોગ પણ બનવું પડે છે. આવો જ એક કિસ્સો પ્રકાશમાં આવ્યો છે. શહેરના મેઘાણીનગર વિસ્તારમાં રહેતો અને સીએનો અભ્યાસ કરતો યુવક ઈલેક્ટ્રીક વ્હીકલ ખરીદવા માગતો હતો. જેથી તેણે ઓનલાઈન તપાસ કરી હતી. ઓનલાઈન ઈલેક્ટ્રિક વ્હીકલ ખરીદવાની લાલચમાં આ યુવકને 1.50 લાખ ગુમાવવા પડ્યા છે. યુવકે ગૂગલ પરથી કસ્ટમેર કેરનો નંબર મેળવ્યો હતો. એ પછી ઠગે બુકિંગ, ઈન્સ્યોરન્સ, હપ્તા સહિત ટુકડે ટુકડે 1.50 લાખ ભરાવ્યા હતા. પરંતુ આ ઠગે યુવકને ઈલેક્ટ્રીક વ્હીકલ આપ્યું નહોતું. આખરે યુવકને અહેસાસ થયો કે પોતે છેતરાયો છે. એટલે તેણે મેઘાણીનગર પોલીસ સ્ટેશનમાં ફરિયાદ નોંધાવી હતી. પોલીસે આ મામલે ગુનો નોંધીને આગળની કાર્યવાહી હાથ ધરી હતી.
પોલીસ સૂત્રોના જણાવ્યા મુજબ શહેરના મેઘાણીનગર વિસ્તારમાં રહેતો 21 વર્ષીય કરણ રાજેશકુમાર મેધાણી સીએનો અભ્યાસ કરે છે. તે ઈલેક્ટ્રિક વ્હીકલ ખરીદવા માંગતો હતો. એટલે તેણે ઓનલાઈન સર્ચ કર્યું હતું. તેને એક ખાનગી વેબસાઈટ મળી હતી. એના પરથી તેણે ખાનગી કસ્ટમર કેરનો નંબર મેળવ્યો હતો. આ નંબર પર કરણે ઈલેક્ટ્રીક વ્હીકલ માટે પૂછપરછ કરી હતી. જ્યાંથી તેને અન્ય એક મોબાઈલ નંબર મળ્યો હતો અને આ નંબર અનિકેત પંડ્યા નામની વ્યક્તિનો હતો. આ નંબર પર કરણે વાત કરી હતી અને ઈલેક્ટ્રીક વ્હીકલમાં કેટલા મોડલ આવે છે વગેરે માહિતી મેળવી હતી. અનિકેત પંડ્યાએ કરણને બે મોડલ વિશે વાત કરી હતી અને 32 હજારની સબસીડી મળશે એવું કહ્યું હતું. આ સિવાય આ શખસે કરણના ઈમેલ આઈડી પર બાઈકના ફોટા વગેરે સહિતની વિગતો પણ મોકલી હતી. એ પછી કરણ પોતાના માતા-પિતા સાથે વાતચીત કરીને એક બાઈક પસંદ કર્યું હતું. આ બાઈક માટે અનિકેત પંડ્યાએ કરણને 72 હજાર રુપિયા ભરવાનું કહ્યું હતું. આ રકમ કરણે ભરી લીધી હતી. આ રકમ ભરેલાની પહોંચ પણ કરણને મોકલવામાં આવી હતી. થોડા સમય બાદ અનિકેતે અચાનક એક પેટીએમ આઈડી મોકલ્યું હતું અને તેમાં 15 હજાર હપ્તના ભરાવાનું કહ્યું હતું. એ પછી ઈન્સ્યોરન્સ માટે પણ પૈસા મંગાવ્યા હતા. આ રીતે અનિકેતે કરણ પાસે જુદી જુદી રીતે 1,50,500 રુપિયા મંગાવી લીધા હતા. પરંતુ બાઈક મોકલ્યુ નહતું. આખરે કરણને અહેસાસ થયો કે પોતે છેતરાયો છે એટલે તેણે મેઘાણીનગર પોલીસ સ્ટેશનમાં ફરિયાદ નોંધાવી હતી.
