ભૂજ, 27 ફેબ્રુઆરી 2026: Poshna Doda plantation caught on two acres in Kutch કચ્છના રાપર તાલુકાના ભીમાસર-ભુટકિયા સીમમાં સરકારી ટાવર પાસેની બે એકર જમીનમાં ગેરકાયદેસર રીતે કરવામાં આવેલું અફીણ અને પોષ ડોડાનું વાવેતર ઝડપી પાડી સરહદી રેન્જ આઈજીની ટીમે વાગડ પંથકમાં ચકચાર મચાવી દીધી છે. આ કાર્યવાહીથી નશાના સોદાગરો સાથે સ્થાનિક પોલીસ બેડામાં ફફડાટ વ્યાપી ગયો છે.
કચ્છના રાપર તાલુકાના ભીમાસર (ભુટકિયા) ગામની સીમમાં પોલીસ ત્રાટકીને નશાના કાળા કારોબારનો પર્દાફાશ કર્યો છે. અંદાજે 2 એકર જમીનમાં ગેરકાયદેસર રીતે કરવામાં આવેલું અફીણ ડોડાનું વિશાળ વાવેતર પોલીસે ઝડપી પાડ્યું છે. આ મામલે પોલીસે 9.41 કરોડ રૂપિયાનો મુદ્દામાલ જપ્ત કરી ત્રણ શખસોની ધરપકડ કરી છે.
રેન્જ આઈ.જી. ચિરાગ કોરડીયાએ માહિતી આપતા જણાવ્યું હતું કે, સાયબર સેલના પી.આઈ. બોડાણાને મળેલી ચોક્કસ બાતમીના આધારે આ રેડ કરવામાં આવી હતી. તપાસ દરમિયાન પોલીસની ટીમ પણ 2 એકર જમીનમાં લહેરાતી અફીણની ખેતી જોઈને ચોંકી ઉઠી હતી. પોલીસે ખેતરમાંથી કુલ 6,273.349 કિલોગ્રામ અફીણ ડોડાનો જથ્થો જપ્ત કર્યો છે, જેની આંતરરાષ્ટ્રીય બજાર કિંમત અંદાજે 9 કરોડ 41 લાખ રૂપિયાથી વધુ આંકવામાં આવી છે. આ ગેરકાયદેસર વાવેતર કરવા બદલ પોલીસે ભીમાસર ગામના પ્રભુ સોઢા, કિશોર ગોયલ અને મનસુખ ગોયલ એમ ત્રણ વ્યક્તિઓની અટકાયત કરી છે. આટલી મોટી માત્રામાં અફીણનું વાવેતર કોના કહેવાથી કરવામાં આવ્યું હતું અને આ માલ ક્યાં સપ્લાય કરવાનો હતો તે દિશામાં પોલીસે તપાસના ચક્રો ગતિમાન કર્યા છે.
