બીસીસીઆઈએ ડ્રીમ 11 સાથેના સંબંધ તોડી નાખ્યાં
નવી દિલ્હીઃ ઓનલાઈન ગેમિંગ મામલે બિલ લોકસભામાં પસાર થયા બાદ કેટલીક ઓનલાઈન ગેમિંગ કંપનીઓએ પોતાની એપ્સ ઉપરથી નાણા અંગેની ગેમ હટાવવાની કાર્યવાહી શરૂ કરી છે. દરમિયાન દુનિયાના સૌથી ધનિક ક્રિકેટ બોર્ડ BCCI એ ડ્રીમ 11 સાથે પોતાના સંબંધો તોડી નાખ્યા છે. દરમિયાન BCCI સેક્રેટરી દેવજીત સૈકિયાએ કહ્યું કે તેઓ હવે આવી કંપનીઓ સાથે ક્યારેય જોડાશે નહીં.
ડ્રીમ 11 અને ભારતીય ક્રિકેટ કંટ્રોલ બોર્ડ વર્ષ 2023 માં જોડાયેલા હતા અને બંને વચ્ચે વર્ષ 2026 સુધી કરાર હતો. ડ્રીમ 11 એ વર્ષ 2026 સુધી BCCI ને 358 કરોડ રૂપિયા ચૂકવવાના હતા, પરંતુ હવે આ કરાર અધવચ્ચે જ તૂટી ગયો છે, જેના કારણે BCCI ને નુકસાન થયું છે. પ્રશ્ન એ છે કે એશિયા કપ પહેલા કઈ કંપની BCCI સાથે હાથ મિલાવશે તે જોવું રસપ્રદ રહેશે. બાય ધ વે, BCCI નો My11Circle સાથે પણ સંબંધ છે. આ કંપની IPL માં ફેન્ટસી પાર્ટનર છે. આ કંપની એક વર્ષમાં BCCI ને પણ મોટી રકમ ચૂકવે છે. અહેવાલો અનુસાર, My11Circle BCCI ને વાર્ષિક 125 કરોડ રૂપિયા ચૂકવે છે.
ટીમ ઈન્ડિયાની જર્સી પર કોનું નામ હશે તેનો જવાબ ટૂંક સમયમાં મળી શકે છે. કારણ કે અહેવાલો અનુસાર, ઘણી મોટી કંપનીઓ BCCI સાથે કરાર કરવા માટે તૈયાર છે. આમાં ટાટા, રિલાયન્સ, અદાણી જેવા મોટા નામોનો સમાવેશ થાય છે. ટાટા પહેલાથી જ IPL ના પ્રાયોજક છે, જ્યારે રિલાયન્સ જિયો પણ પ્રસારણમાં સામેલ છે. આ કંપનીઓ ઉપરાંત, ગ્રો, ઝેરોધા જેવી કંપનીઓ પણ આ કરાર કરી શકે છે. મહિન્દ્રા અને ટોયોટા જેવી મોટી ઓટોમોબાઈલ કંપનીઓ પણ BCCI સાથે તેમના નામ જોડી શકે છે. પેપ્સી પણ આ રેસમાં હોવાનું કહેવાય છે.
