નવી દિલ્હીઃ આતંકવાદી ખતરાને ધ્યાનમાં રાખીને, NSG દેશના 50 થી વધુ સંવેદનશીલ ધાર્મિક, પરમાણુ ઉર્જા કેન્દ્રો અને અન્ય સંવેદનશીલ સ્થળોનું નિરીક્ષણ અને 3D મેપિંગ કરી રહ્યું છે, જેમાં જમ્મુમાં માતા વૈષ્ણોદેવી મંદિર, અયોધ્યામાં રામ મંદિર અને દિલ્હીમાં અક્ષરધામ મંદિરનો સમાવેશ થાય છે. જેથી કોઈપણ પ્રકારના આતંકવાદી હુમલા અને અન્ય કટોકટીની સ્થિતિમાં, NSG કમાન્ડો તાત્કાલિક કાર્યવાહી કરી શકે. તેમ NSGના DG ભૃગુ શ્રીનિવાસને દિલ્હીમાં આયોજિત NSGના 23મા કાઉન્ટર ટેરર સેમિનારમાં જણાવ્યું હતું. આ કાર્યક્રમમાં મુખ્ય મહેમાન કેન્દ્રીય ગૃહ રાજ્યમંત્રી નિત્યાનંદ રાય હતા.
DG શ્રીનિવાસને જણાવ્યું હતું કે NSGના ‘બ્લેક કેટ’ કમાન્ડોએ ‘ઓપરેશન સિંદૂર’ દરમિયાન પણ ભૂમિકા ભજવી હતી. જેમાં જમ્મુ એરપોર્ટ પર “વિસ્ફોટક પેલોડ વહન કરતા ડ્રોનને નિષ્ક્રિય કરવામાં આવ્યું હતું. ‘ઓપરેશન સિંદૂર’ ઉપરાંત, NSG ટીમોએ સરહદી વિસ્તારોમાંથી પાકિસ્તાનથી ઉડતા મૃત ડ્રોન અને કામિકાઝ ડ્રોન પણ જપ્ત કર્યા છે. તેમણે કહ્યું કે અમે દેશભરમાં વિવિધ સંવેદનશીલ લક્ષ્યોનું નિરીક્ષક કરી રહ્યાં છે. આમાં 17 ધાર્મિક સ્થળો, 21 પરમાણુ અને 14 અન્ય આવા સ્થાપનોનો સમાવેશ થાય છે. આ સ્થળોનું ૩ડી મેપિંગ કરવામાં આવી રહ્યું છે.
તેમણે કહ્યું કે એનએસજી કમાન્ડોને હવા, જમીન અને જળ માર્ગો દ્વારા કોઈપણ જરૂરી સ્થાન પર ઝડપથી અને ‘સમયસર’ પહોંચવા માટે તાલીમ આપવામાં આવી રહી છે. તેમણે એમ પણ કહ્યું કે દળે નક્સલ વિરોધી ભૂમિકા પણ ભજવી છે અને તેના કમાન્ડોની એક ટીમ મહારાષ્ટ્રના ડાબેરી ઉગ્રવાદ (LWE) પ્રભાવિત જિલ્લા ગઢચિરોલીમાં રાજ્ય પોલીસ દળો સાથે સંયુક્ત કામગીરી કરવા માટે તૈનાત છે.
તેમણે કહ્યું કે એનએસજીએ રાજ્યમાં નક્સલ વિરોધી કામગીરી માટે તૈનાત છત્તીસગઢ પોલીસના ડિસ્ટ્રિક્ટ રિઝર્વ ગાર્ડ (DRG) યુનિટ સાથે સંયુક્ત કવાયત પણ હાથ ધરી છે. અમે એનએસજી ક્લસ્ટરો (દેશભરમાં સ્થિત દળના પાંચ બેઝ) ને મજબૂત બનાવી રહ્યા છીએ જેથી તેઓ કોઈપણ આતંકવાદ વિરોધી પરિસ્થિતિનો સ્વતંત્ર રીતે સામનો કરી શકે. દિલ્હી નજીક માનેસર (હરિયાણા) ખાતે તેના મુખ્ય ગેરિસન ઉપરાંત, એનએસજીના મુંબઈ, હૈદરાબાદ, ચેન્નાઈ, કોલકાતા અને ગાંધીનગરમાં હબ છે.
ડીજીએ જણાવ્યું હતું કે અમે ગયા વર્ષે 8,000 કમાન્ડોથી અમારી તાલીમ ક્ષમતા વધારીને 13,000 કરી છે. 2025 ના અંત સુધીમાં આ સંખ્યા 20,000 રાજ્ય પોલીસ કર્મચારીઓ સુધી વધારવામાં આવશે. તે બધાને NSG કમાન્ડો તાલીમ સાથે તાલીમ આપી શકાય છે. અમે રાજ્ય પોલીસ દળો માટે આતંકવાદ વિરોધી, હાઇજેકિંગ વિરોધી, બોમ્બ નિકાલ, VIP સુરક્ષા (વ્યક્તિગત સુરક્ષા અધિકારી) અને વ્યૂહાત્મક ડ્રાઇવિંગ અને કાઉન્ટર-ડ્રોન કામગીરીમાં તાલીમ આપવા માટે કસ્ટમાઇઝ્ડ કેપ્સ્યુલ કોર્સ ડિઝાઇન કર્યા છે.
