વારાણસીઃ રાજ્યપાલ આનંદીબેન પટેલે મહિલાઓ વિરુદ્ધ વધતી હિંસાની ઘટનાઓ પર ગંભીર ચિંતા વ્યક્ત કરી છે અને યુવતીઓને લિવ-ઇન રિલેશનશિપ જેવી પરિસ્થિતિઓથી દૂર રહેવાની સલાહ આપી છે. મહાત્મા ગાંધી કાશી વિદ્યાપીઠના 47મા દીક્ષાંત સમારોહમાં આનંદીબેન પટેલે જણાવ્યું હતું કે, “લિવ-ઇન રિલેશનમાં ન આવો દીકરીઓ, 50-50 ટુકડાં કરીને ભરનારાઓને જોયા છે.” તેમણે જણાવ્યું કે યુવતીઓએ પોતાના જીવનના નિર્ણયો ખૂબ વિચારીને લેવા જોઈએ. સમાજમાં એવા તત્ત્વો છે જે તેમનું શોષણ કરી શકે છે, તેથી સાવચેતી અને સમજદારી રાખવી જરૂરી છે.
આનંદીબેન પટેલે વધુમાં જણાવ્યું કે વિદ્યાર્થીઓની સંખ્યા વધવી એ સૂચવે છે કે તેઓ ઉચ્ચ ગુણવત્તાવાળી શિક્ષણ મેળવી રહ્યા છે. તેમણે મેડલ વિજેતાઓને અભિનંદન પાઠવતાં કહ્યું કે મહાત્મા ગાંધીજીના વિચારો અને મૂલ્યોને માત્ર વાંચવા પૂરતા નહીં, પરંતુ જીવનમાં ઉતારવા જરૂરી છે. રાજ્યપાલે પ્રધાનમંત્રી નરેન્દ્ર મોદીના સ્વચ્છતા અભિયાનનો ઉલ્લેખ કરતાં કહ્યું કે આપણે આપણા વિશ્વવિદ્યાલય અને આસપાસના વિસ્તારોને સ્વચ્છ રાખવાની જવાબદારી લેવી જોઈએ. તેમણે વિદ્યાર્થીઓને સામાજિક જવાબદારી નિભાવવાની અપીલ કરી હતી.
આ પ્રસંગે રાજ્યપાલે કુલ 55,642 વિદ્યાર્થીઓને સ્નાતકની ઉપાધિ આપી, જેમાંથી 34,252 વિદ્યાર્થિનીઓ અને 21,387 વિદ્યાર્થી સામેલ હતા. તેમજ 15,321 વિદ્યાર્થીઓને સ્નાતકોત્તરની ડિગ્રી અને 178 સંશોધકોને પીએચ.ડી.ની ઉપાધિ આપવામાં આવી હતી. ઉપરાંત 101 પ્રતિભાશાળી વિદ્યાર્થીઓને સ્વર્ણપદકથી સન્માનિત કરવામાં આવ્યા હતા.
