ઇઝરાયલ ઈરાનના તમામ પરમાણુ સ્થળોનો નાશ કરી શકે છે: પ્રધાનમંત્રી બેન્જામિન નેતન્યાહૂ
ઇઝરાયલ અને ઈરાન વચ્ચે ચાલી રહેલા સંઘર્ષ દરમિયાન, ઇઝરાયલી પ્રધાનમંત્રી બેન્જામિન નેતન્યાહૂએ કહ્યું હતું કે ઇઝરાયલ ઈરાનના તમામ પરમાણુ સ્થળો પર હુમલો કરી શકે છે. આ માટે, તેઓ ઈરાનના પરમાણુ સ્થળોને નિશાન બનાવવા માટે આંતરરાષ્ટ્રીય સમર્થનનું સ્વાગત કરે છે. અમેરિકાના રાષ્ટ્રપતિ ડોનાલ્ડ ટ્રમ્પનો ઉલ્લેખ કરતા તેમણે કહ્યું કે ટ્રમ્પ એ કરશે જે અમેરિકા માટે સારું છે અને હું એ કરીશ જે ઇઝરાયલ માટે સારું છે. નેતન્યાહૂએ નિવેદનમાં કહ્યું કે ઇઝરાયલ ઇરાન સાથેના યુદ્ધ દ્વારા દુનિયાનો ચહેરો બદલી રહ્યું છે.
ઇઝરાયલી વડા પ્રધાન બેન્જામિન નેતન્યાહૂએ દાવો કર્યો હતો કે તેમણે ઇરાનના અડધાથી વધુ મિસાઇલ લોન્ચર્સનો નાશ કર્યો છે. નેતન્યાહૂએ સોરોકા મેડિકલ સેન્ટરની મુલાકાત લીધી હતી. તે દરમિયાન તેમણે કહ્યું હતું કે ઇઝરાયલી હુમલાથી કોઈ બચી શકશે નહીં. તેમણે સંકેત આપ્યો કે ઈરાનના સર્વોચ્ચ નેતા આયાતુલ્લાહ અલી ખામેની પણ ઈઝરાયલનું સંભવિત નિશાન બની શકે છે. આ દરમિયાન, ઈઝરાયલના સંરક્ષણ પ્રધાન ઈઝરાયલ કાત્ઝે પણ ખામેનીને આધુનિક હિટલર ગણાવ્યા અને તેમના અસ્તિત્વને ખતમ કરવાની વાત કરી. તેમણે સ્પષ્ટપણે કહ્યું કે ઈરાનમાં હાજર આ સરમુખત્યારશાહી શાસન હવે માનવતા માટે ખતરો બની ગયું છે.
ઈરાની હુમલાઓ અને ઇઝરાયલી પ્રતિક્રિયા
ઈરાને તેલ અવીવ અને દક્ષિણ ઇઝરાયલના વિસ્તારો પર મિસાઇલ અને ડ્રોન હુમલા કર્યા, જેમાં સેંકડો ઘાયલ થયા. ઈરાને હોસ્પિટલો, રહેણાંક ઘરો અને જાહેર સ્થળો સહિત ઇઝરાયલી નાગરિક લક્ષ્યોને નિશાન બનાવ્યા. આ હુમલાઓના જવાબમાં, ઇઝરાયલે ઇરાનના પરમાણુ સ્થળો પર હવાઈ હુમલા કર્યા. વોશિંગ્ટન સ્થિત માનવાધિકાર જૂથ અનુસાર, આ હુમલાઓમાં 639 લોકો માર્યા ગયા હતા, જેમાંથી 263 નાગરિકો હતા. બીજી તરફ, ઇઝરાયલમાં પણ 24 લોકોના મોત થયા હતા અને સેંકડો ઘાયલ થયા હતા. આ પહેલા, ઇઝરાયલે ઇરાનના પરમાણુ અને લશ્કરી થાણાઓ પર હુમલો કર્યો હતો અને તેના ઘણા ટોચના કમાન્ડરો અને વૈજ્ઞાનિકોને મારી નાખ્યા હતા.
