અમેરિકી રાષ્ટ્રપતિ ડોનાલ્ડ ટ્રમ્પે કહ્યું કે ભલે તેઓ સંઘર્ષનો અંત લાવવા માટે રાજદ્વારી ઉકેલ શોધવાનો પ્રયાસ કરી રહ્યા હોય, પરંતુ આ સમયે ઈઝરાયલને ઈરાન પર હવાઈ હુમલા બંધ કરવાનું કહેવું મુશ્કેલ હશે. ટ્રમ્પ ન્યુ જર્સીમાં તેમના ગોલ્ફ કોર્સમાં ભંડોળ ઊભું કરવા માટે એક કાર્યક્રમમાં હાજરી આપી રહ્યા હતા. ‘ઝિન્હુઆ ન્યૂઝ એજન્સી’એ સ્થાનિક મીડિયાને ટાંકીને આ જણાવ્યું હતું. અહીં પત્રકારો સાથે વાત કરતી વખતે ટ્રમ્પે ઈરાન સાથે રાજદ્વારી રીતે જોડાવાના યુરોપિયન પ્રયાસોને પણ નકારી કાઢ્યા હતા.
ટ્રમ્પે કહ્યું, “તેઓએ મદદ કરી નથી, ઈરાન યુરોપ સાથે વાત કરવા માંગતો નથી. તેઓ અમારી સાથે વાત કરવા માંગે છે. યુરોપ આ બાબતમાં મદદ કરી શકશે નહીં.” અગાઉ, યુએસ સ્ટેટ ડિપાર્ટમેન્ટના પ્રવક્તા ટેમી બ્રુસે કહ્યું હતું કે તેઓ ‘અનુમાન’ કરી શકતા નથી કે ટ્રમ્પ વહીવટીતંત્ર યુએસ-ઈરાન પરમાણુ વાટાઘાટોને આગળ વધારવા માટે ઈરાન અને ઇઝરાયલ વચ્ચે યુદ્ધવિરામ માટે દબાણ કરશે કે નહીં.
બ્રુસે શુક્રવારે એક ન્યૂઝ બ્રીફિંગમાં કહ્યું કે, .”હું હાલમાં શું થઈ રહ્યું છે તેનું વર્ણન કરવાનો નથી, રાષ્ટ્રપતિ કે રાજ્ય સચિવ તે વાટાઘાટો પર કેવી પ્રતિક્રિયા આપશે,” દરમિયાન, ઇઝરાયલ ડિફેન્સ ફોર્સ (IDF)એ જાહેરાત કરી છે કે શુક્રવારે સવારે 25થી વધુ ઇઝરાયલી વાયુસેનાના ફાઇટર જેટ્સ દ્વારા કરવામાં આવેલા હુમલામાં ઇરાનના તિબેરિયાસ અને કરમાનશાહ પ્રદેશોમાં 35થી વધુ મિસાઇલ સ્ટોરેજ અને લોન્ચ સુવિધાઓનો નાશ કરવામાં આવ્યો છે.
IDFએ એક પોસ્ટમાં લખ્યું. “આજે સવારે, વાયુસેનાએ, ગુપ્તચર શાખાના ચોક્કસ માર્ગદર્શન સાથે, ઇરાનના કરમાનશાહ અને તિબેરિયાસ જેવા વિસ્તારોમાં ઇરાની શાસનના લશ્કરી થાણાઓ પર શ્રેણીબદ્ધ હુમલાઓ પૂર્ણ કર્યા. હુમલાઓની આ શ્રેણીના ભાગ રૂપે 25થી વધુ ફાઇટર જેટ્સે ઇરાનના તિબેરિયાસ અને કરમાનશાહ પ્રદેશોમાં 35થી વધુ મિસાઇલ સ્ટોરેજ અને લોન્ચ સુવિધાઓ પર હુમલો કર્યો,”
IDFએ એ પણ નોંધ્યું છે કે ઇઝરાયલી વાયુસેનાએ ઇસ્ફહાન અને તેહરાનના વિસ્તારોમાં ઘણી ઇરાની મિસાઇલ સિસ્ટમ્સ અને રડાર સ્થાપનો પર હુમલો કર્યો હતો, જેનો હેતુ તેના વિમાનોને નિશાન બનાવવા અને તેમની કામગીરીમાં વિક્ષેપ પાડવાનો હતો.
