દિલ્હીમાં આયુષ્માન ભારત સ્વાસ્થ્ય યોજના હાલ લાગુ નહીં થાય, સુપ્રીમ કોર્ટે ફરમાવ્યો સ્ટે

નવી દિલ્હીઃ આયુષ્માન ભારત સ્વાસ્થ્ય યોજના સમગ્ર દેશમાં કાર્યરત છે. આ યોજના દેશની રાજધાની દિલ્હીમાં કાર્યરત કરવાની દિશામાં કામગીરી ચાલી રહી છે. દરમિયાન સુપ્રીમ કોર્ટે દિલ્હીમાં આ યોજના લાગુ કરવાનો હાલ ઉપર સ્ટે ફરમાવ્યો છે. તેમજ આ અંગે આગામી દિવસોમાં વધુ સુનાવણી હાથ ધરવામાં આવશે.

સુપ્રીમ કોર્ટે શુક્રવારે આદેશમાં રાષ્ટ્રીય રાજધાની દિલ્હીમાં પીએમ આયુષ્માન ભારત હેલ્થ ઈન્ફ્રાસ્ટ્રક્ચર મિશન (PM-ABHIM) યોજનાના અમલીકરણ પર હાલ પૂરતો પ્રતિબંધ લગાવી દીધો છે. હકીકતમાં, દિલ્હી હાઈકોર્ટે તેના એક આદેશમાં કેન્દ્રીય આરોગ્ય મંત્રાલય અને દિલ્હી સરકાર વચ્ચે એક કરાર કરવાનો નિર્દેશ આપ્યો હતો. આ કરાર હેઠળ, પ્રધાનમંત્રી આયુષ્માન ભારત આરોગ્ય માળખાગત મિશન રાષ્ટ્રીય રાજધાની દિલ્હીમાં લાગુ કરવાનું હતું. જોકે, હવે સુપ્રીમ કોર્ટે દિલ્હી હાઈકોર્ટના નિર્ણય પર રોક લગાવી દીધી છે.