શેખ હસીનાને ‘માનવતા વિરુદ્ધ અપરાધો’ માટે બાંગ્લાદેશે બીજુ ધરપકડ વોરંટ જાહેર કર્યું

નવી દિલ્હીઃ બાંગ્લાદેશની એક અદાલતે પૂર્વ વડાપ્રધાન શેખ હસીના સામે બીજું ધરપકડ વોરંટ જારી કર્યું છે. આ વખતે વોરંટ તેમની કથિત ભૂમિકાને કારણે ગુમ થવાના કેસમાં જારી કરવામાં આવ્યું હતું. 77 વર્ષીય હસીના વિરુદ્ધ માનવતા વિરુદ્ધના ગુનાના આરોપસર ધરપકડ વોરંટ જારી કરવામાં આવ્યું છે.

પ્રાપ્ત માહિતી અનુસાર વિદ્યાર્થીઓના આંદોલનથી ઉદભવેલા ગુસ્સાને પગલે હસીનાએ ગયા વર્ષે ઓગસ્ટમાં સત્તા છોડીને ભારત ભાગી જવું પડ્યું હતું. ડોમેસ્ટિક ઈન્ટરનેશનલ ક્રિમિનલ ટ્રિબ્યુનલ (ICT)ના મુખ્ય ફરિયાદી તાજુલ ઈસ્લામે જણાવ્યું હતું કે, મીડિયા અહેવાલો અનુસાર, તેમના શાસન દરમિયાન બળજબરીથી ગુમ થવાથી સંબંધિત બીજું વોરંટ છે.

બાંગ્લાદેશી સુરક્ષા કર્મચારીઓએ 500 થી વધુ લોકોનું અપહરણ કર્યું હોવાનો આરોપ છે, જેમાંથી કેટલાકને કેટલાક વર્ષો સુધી ગુપ્ત ઠેકાણાઓમાં અટકાયતમાં રાખવામાં આવ્યા હતા. ઇસ્લામે કહ્યું, “કોર્ટે શેખ હસીના અને તેના સૈન્ય સલાહકાર, લશ્કરી કર્મચારીઓ અને અન્ય કાયદા અમલીકરણ અધિકારીઓ સહિત અન્ય 11 વિરુદ્ધ વોરંટ જારી કર્યું છે.” વચગાળાની સરકાર હસીનાના પ્રત્યાર્પણ અને ટ્રાયલને મોટો મુદ્દો બનાવી રહી છે.

મીડિયા અહેવાલો અનુસાર, મુખ્ય સલાહકારના પ્રેસ સચિવ શફીકુલ આલમે એક પ્રેસ કોન્ફરન્સ દરમિયાન ભાર મૂક્યો હતો કે હસીનાને ‘માનવતા વિરુદ્ધ અપરાધો’ માટે ન્યાયનો સામનો કરવો જોઈએ. બાંગ્લાદેશની વચગાળાની સરકારે તાજેતરમાં જ ભારત સરકારને રાજદ્વારી નોંધ મોકલીને દેશના પૂર્વ વડાપ્રધાન શેખ હસીનાના પ્રત્યાર્પણની માંગણી કરી છે.

તૌહીદ હુસૈન, વચગાળાની સરકારના વિદેશ બાબતોના સલાહકાર, 23 ડિસેમ્બરે ઢાકામાં જણાવ્યું હતું કે, “અમે ભારતને જાણ કરી છે અને ન્યાયિક હેતુઓ માટે શેખ હસીનાને પરત કરવા વિનંતી કરી છે. આ એક નોટ વર્બેલ (ડિપ્લોમેટિક નોટ) દ્વારા જણાવવામાં આવ્યું છે.”