નવી દિલ્હીઃ કેન્દ્ર સરકારે આવકવેરા કાયદાની કલમ 54-ઈસી હેઠળ જાહેર ક્ષેત્રના નવીનીકરણીય ઉર્જા પ્રોજેક્ટ્સને ધિરાણ આપતી કંપની, ઇન્ડિયન રિન્યુએબલ એનર્જી ડેવલપમેન્ટ એજન્સી લિમિટેડ (ઈરેડા) ના બોન્ડ્સને કર-બચતનો દરજ્જો આપ્યો છે. આ સૂચના 9 જુલાઈ, 2025 થી અમલમાં આવી છે. નવી અને નવીનીકરણીય ઉર્જા મંત્રાલય દ્વારા જારી કરાયેલા એક નિવેદનમાં જણાવવામાં આવ્યું હતું કે, નાણા મંત્રાલય હેઠળના સેન્ટ્રલ બોર્ડ ઓફ ડાયરેક્ટ ટેક્સ (સીબીડીટી) એ આવકવેરા કાયદા, 1961 ની કલમ 54-ઈસી હેઠળ ઇન્ડિયન રિન્યુએબલ એનર્જી ડેવલપમેન્ટ એજન્સી લિમિટેડ દ્વારા જારી કરાયેલા બોન્ડ્સને ‘લાંબા ગાળાની ચોક્કસ સંપત્તિ’ તરીકે સૂચિત કર્યા છે. આ સૂચના 9 જુલાઈ, 2025 થી અમલમાં છે. આ નવીનીકરણીય ઉર્જા માટે ઓછા ખર્ચે ભંડોળ એકત્ર કરવામાં સુવિધા આપશે અને રોકાણકારોને મૂડી લાભ કરમાં મુક્તિ મળશે.
મંત્રાલય અનુસાર, સીબીડીટીના સૂચના મુજબ, ઈરેડા દ્વારા સૂચના તારીખે અથવા તે પછી જારી કરાયેલા અને પાંચ વર્ષ પછી રિડીમ કરવાના બોન્ડ, આવકવેરા અધિનિયમ, 1961 ની કલમ 54-ઈસી હેઠળ કર મુક્તિ માટે પાત્ર રહેશે, જે ચોક્કસ બોન્ડમાં રોકાણ પર મૂડી લાભ કરમાં મુક્તિ આપે છે. આ બોન્ડમાંથી એકત્ર થયેલી રકમનો ઉપયોગ ફક્ત તે નવીનીકરણીય ઉર્જા પ્રોજેક્ટ્સ માટે કરવામાં આવશે, જે તેમના પ્રોજેક્ટ આવક દ્વારા લોન ચૂકવવા સક્ષમ છે, અને તેમને લોન ચૂકવવા માટે રાજ્ય સરકારો પર નિર્ભર રહેવું પડશે નહીં.
નવી અને નવીનીકરણીય ઉર્જા મંત્રાલયે જણાવ્યું હતું કે, લાયક રોકાણકારો નાણાકીય વર્ષમાં આ બોન્ડમાં રોકાણ કરીને 50 લાખ રૂપિયા સુધીના લાંબા ગાળાના મૂડી લાભ (એલટીસીજી) પર કર બચાવી શકે છે. ઈરેડા ને ભંડોળના ઓછા ખર્ચનો લાભ મળશે, જે નવીનીકરણીય ઉર્જા ક્ષેત્ર માટે એક મહત્વપૂર્ણ વિકાસ છે અને બદલામાં નવીનીકરણીય ઉર્જા ક્ષેત્રના ઝડપી વિકાસને ટેકો આપશે. મંત્રાલયે જણાવ્યું હતું કે આ પહેલથી કર બચત સાધનો શોધી રહેલા રોકાણકારોની વ્યાપક ભાગીદારી આકર્ષિત થવાની અને દેશમાં નવીનીકરણીય ઊર્જા ધિરાણ ઇકો-સિસ્ટમને મજબૂત બનાવવાની અપેક્ષા છે.
