જમ્મુ-કાશ્મીરના ઉધમપુરમાં એક અકસ્માત થયો. સેન્ટ્રલ રિઝર્વ પોલીસ ફોર્સ (CRPF) ના જવાનોને લઈ જતું વાહન બસંતગઢમાં ખાડામાં પડી ગયું, જેના લીધે ત્રણ જવાનોના મોત થયા અને ઘણા ઘાયલ થયા. તમામ ઘાયલોને કમાન્ડ હોસ્પિટલમાં મોકલવામાં આવ્યા છે. કેન્દ્રીય મંત્રી જીતેન્દ્ર સિંહે અકસ્માત પર દુઃખ વ્યક્ત કર્યું છે.
માહિતી આપતાં, ઉધમપુરના એડિશનલ એસપી સંદીપ ભટે જણાવ્યું હતું કે, “જમ્મુ અને કાશ્મીરના ઉધમપુર જિલ્લાના બસંતગઢ વિસ્તારમાં કંડવા નજીક સીઆરપીએફ વાહન દુર્ઘટનાગ્રસ્ત થતાં ત્રણ સૈનિકો માર્યા ગયા અને 12 ઘાયલ થયા. પોલીસ ઘટનાસ્થળે પહોંચી ગઈ અને બચાવ કામગીરી શરૂ કરી. બધા ઘાયલોને સારવાર માટે નજીકની હોસ્પિટલમાં ખસેડવામાં આવ્યા છે.”
સ્થાનિક લોકો મદદ માટે આગળ આવ્યા
કેન્દ્રીય મંત્રી ડૉ. જીતેન્દ્ર સિંહે અકસ્માત પર દુઃખ વ્યક્ત કર્યું. તેમણે એમ પણ કહ્યું કે સ્થાનિક લોકો મદદ માટે આગળ આવ્યા છે. ડૉ. જીતેન્દ્ર સિંહે એક X પોસ્ટમાં લખ્યું, “કંડવા-બસંતગઢ વિસ્તારમાં CRPF વાહનના અકસ્માતના સમાચાર સાંભળીને મને દુઃખ થયું છે. વાહનમાં બહાદુર CRPF જવાનો મુસાફરી કરી રહ્યા હતા. બચાવ કામગીરી તાત્કાલિક શરૂ કરવામાં આવી છે. સ્થાનિક લોકો પોતાની રીતે મદદ કરવા આગળ આવ્યા છે. શક્ય તેટલી મદદ પૂરી પાડવામાં આવી રહી છે.”
લેફ્ટનન્ટ ગવર્નર મનોજ સિન્હાએ દુઃખ વ્યક્ત કર્યું
જમ્મુ અને કાશ્મીરના લેફ્ટનન્ટ ગવર્નર મનોજ સિન્હાએ પણ આ અકસ્માત પર દુઃખ વ્યક્ત કર્યું હતું. તેમણે એક એક્સ પોસ્ટ દ્વારા કહ્યું હતું કે, “ઉધમપુર નજીક થયેલા અકસ્માતમાં CRPF જવાનોના મૃત્યુના સમાચારથી હું દુઃખી છું. રાષ્ટ્ર પ્રત્યેની તેમની સેવાને આપણે હંમેશા યાદ રાખીશું. મારા સંવેદના તેમના પરિવારો સાથે છે. ઘાયલોના ઝડપથી સ્વસ્થ થવા માટે હું પ્રાર્થના કરું છું.”
