આતંકી હુમલાને પગલે તાત્કાલિક રાહત પગલાના ભાગ રૂપે શ્રીનગરથી ચાર ખાસ ફ્લાઈટની વ્યવસ્થા કરાઈ
નવી દિલ્હીઃ જમ્મુ અને કાશ્મીરના પહેલગામમાં થયેલા આતંકવાદી હુમલા પછી કેન્દ્રીય નાગરિક ઉડ્ડયન મંત્રી રામ મોહન નાયડુએ અસરગ્રસ્ત પ્રવાસીઓ અને પીડિતોની સલામતી અને સુખાકારી સુનિશ્ચિત કરવા માટે ઝડપી પગલાં લીધાં છે.
કેન્દ્રીય મંત્રી નાયડુએ કેન્દ્રીય ગૃહમંત્રી અમિત શાહ સાથે વ્યક્તિગત રીતે વાત કરી હતી અને તેઓ સંબંધિત અધિકારીઓ સાથે ગાઢ સંકલનમાં રહીને પરિસ્થિતિ પર નજર રાખી રહ્યા છે. તાત્કાલિક રાહત પગલાંના ભાગ રૂપે, શ્રીનગરથી 4 ખાસ ફ્લાઇટ્સ (બે દિલ્હી અને બે મુંબઈ) ની વ્યવસ્થા કરવામાં આવી છે.
રામ મોહન નાયડુએ તમામ એરલાઇન ઓપરેટરો સાથે તાત્કાલિક બેઠક યોજી હતી. આ સંવેદનશીલ સમય દરમિયાન કોઈ પણ મુસાફર પર ભાડાનો બોજ ન પડે તે માટે એરલાઇન્સને નિયમિત ભાડા લેવા નિર્દેશ આપવામાં આવ્યો છે. તેમણે મહારાષ્ટ્રના નાયબ મુખ્યમંત્રી સાથે વાત કરી અને પ્રવાસીઓના સુરક્ષિત પાછા ફરવા અને રાજ્ય અધિકારીઓ સાથે સંકલન માટે સંપૂર્ણ સમર્થનની ખાતરી આપી. નાયડુએ આંધ્રપ્રદેશના મુખ્યમંત્રી નારા ચંદ્રબાબુ નાયડુ સાથે પણ વાત કરી અને તેમને પરિસ્થિતિથી વાકેફ કર્યા.
તે જ સમયે, રાજ્યના મુખ્યમંત્રી ઓમર અબ્દુલ્લાની સૂચનાઓનું પાલન કરીને કાશ્મીરમાં ફસાયેલા તેલુગુ લોકોના સુરક્ષિત પરત ફરવામાં મદદ અને સંકલન માટે દિલ્હીના આંધ્ર ભવન ખાતે એક ખાસ હેલ્પ ડેસ્કની સ્થાપના કરવામાં આવી છે.
સહાય અથવા માહિતીની જરૂર હોય તેવા પ્રવાસીઓ માટે આંધ્રપ્રદેશ ભવન (નવી દિલ્હી) ખાતે એક ઈમરજન્સી હેલ્પ ડેસ્કની સ્થાપના કરવામાં આવી છે. પહેલગામ આતંકવાદી ઘટના અંગે માહિતી અથવા સહાય માટે પ્રવાસીઓ 9818395787 અથવા 01123387089 પર સંપર્ક કરી શકે છે.
વધુમાં, રામ મોહન નાયડુએ તમામ એરલાઈન્સને રાજ્ય સરકારો અને સ્થાનિક અધિકારીઓ સાથે મળીને કામ કરવાનો નિર્દેશ આપ્યો છે જેથી મૃતકોને તેમના ગૃહ રાજ્યોમાં પરિવહન કરવામાં સંપૂર્ણ સહયોગ મળે. નાગરિક ઉડ્ડયન મંત્રાલય સંપૂર્ણપણે સતર્ક છે અને અસરગ્રસ્ત લોકોને શક્ય તમામ સહાય પૂરી પાડવા માટે પ્રતિબદ્ધ છે.
