GSTમાં થશે મોટો ફેરફાર, 12%, 28% સ્લેબ નાબૂદ કરવાની ભલામણ, GoM એ કેન્દ્રના પ્રસ્તાવને સ્વીકાર્યો
ગુડ્સ એન્ડ સર્વિસ ટેક્સ (GST) ના દરોને તર્કસંગત બનાવવા અંગે રાજ્યોના નાણામંત્રીઓના જૂથ (GoM) ની એક મહત્વપૂર્ણ બેઠકમાં કેન્દ્ર સરકારના પ્રસ્તાવને સ્વીકારવામાં આવ્યો હતો. બેઠકમાં, કેન્દ્રના ટેક્સ સ્લેબને 5% અને 18% સુધી ઘટાડવાના પ્રસ્તાવ પર ચર્ચા કરવામાં આવી હતી, જેના પર GoM સંમત થયા છે. કેન્દ્ર સરકારે GSTમાં એક મોટો ફેરફાર પ્રસ્તાવિત કર્યો છે, જેમાં 12% અને 28% સ્લેબ દૂર કરવા અને 5% અને 18% ના ફક્ત બે દર રાખવાનો સમાવેશ થાય છે. આ ઉપરાંત, તમાકુ અને પાન મસાલા જેવા માલ પર 40% નો ખાસ દર લાદવામાં આવી શકે છે.
વાસ્તવમાં, કેન્દ્ર સરકાર GSTમાં ફેરફાર દ્વારા સામાન્ય માણસ, ખેડૂતો, મધ્યમ વર્ગ અને MSME ને રાહત આપવા માંગે છે. તે આ દ્વારા કર પ્રણાલીને પણ સરળ બનાવવા માંગે છે.
ચાર GST દરો દૂર કરીને નવી સિસ્ટમ દાખલ કરવામાં આવશે
બિહારના નાયબ મુખ્યમંત્રી સમ્રાટ ચૌધરીના નેતૃત્વ હેઠળના છ સભ્યોના મંત્રી જૂથે 5, 12, 18 અને 28 ટકાના ચાર દરોની હાલની સિસ્ટમને બદલવાના પ્રસ્તાવને મંજૂરી આપી છે. હવે તેના સ્થાને ફક્ત બે દર લાગુ થશે. આવશ્યક ચીજવસ્તુઓ પર 5% અને સામાન્ય ચીજવસ્તુઓ પર 18% કર લાદવાનો પ્રસ્તાવ મૂકવામાં આવ્યો હતો. બીજી તરફ, તમાકુ જેવા કેટલાક હાનિકારક માલ પર 40% નો દર લાગુ થશે.
જીએસટીમાં થયેલા ફેરફારો અંગે શું કહ્યું નાણામંત્રીએ
નાણામંત્રી નિર્મલા સીતારમણે જીએસટીના મુદ્દા પર કહ્યું હતું કે દરોને તર્કસંગત બનાવવાથી સામાન્ય માણસ, ખેડૂતો, મધ્યમ વર્ગ અને સૂક્ષ્મ, નાના અને મધ્યમ ઉદ્યોગો (MSME) ને વધુ રાહત મળશે. આ સાથે, એક સરળ અને પારદર્શક કર વ્યવસ્થા સુનિશ્ચિત કરવામાં આવશે.
તમને જણાવી દઈએ કે હાલમાં GST 5, 12, 18 અને 28 ટકાના દરે વસૂલવામાં આવે છે. ખાદ્યપદાર્થો અને આવશ્યક ચીજવસ્તુઓ પર શૂન્ય અથવા ૫ ટકા કર વસૂલવામાં આવે છે. જ્યારે લક્ઝરી અને હાનિકારક વસ્તુઓ પર 28 ટકાના દરે કર લાદવામાં આવે છે, જેના પર સરચાર્જ પણ વસૂલવામાં આવે છે.
