ગુજરાત બોર્ડની ધોરણ 10 અને 12ની પરીક્ષાનો થયો પ્રારંભ, પરીક્ષાર્થીઓનું સ્વાગત કરાયું
અમદાવાદ, 26 ફેબ્રુઆરી 2026: ગુજરાત માધ્યમિક અને ઉચ્ચતર માધ્યમિક શિક્ષણ બોર્ડ દ્વારા આજથી ધો.10 અને 12ની પરીક્ષાનો શુભારંભ થયો છે, પરીક્ષાના પ્રથમ દિવસે આજે પરીક્ષા કેન્દ્રો પર વિદ્યાર્થીઓનું ગુલાબના ફુલ આપીને સ્વાગત કરાયું હતું. વિદ્યાર્થીઓએ શાંતિપૂર્ણરીતે પરીક્ષા આપી હતી. પરીક્ષાર્થીઓને કોઈ મુશ્કેલી ન પડે તે માટે જિલ્લા કલેકટરો, જિલ્લા પોલીસ વડા, શિક્ષણ વિભાગના ઉચ્ચ અધિકારીઓએ પરીક્ષા કેન્દ્રની મુલાકાત લઈને સમીક્ષા કરી હતી. અને પરીક્ષાર્થીઓને કોઈપણ જાતનો ભય રાખ્યા વિના શાંતચિતે પરીક્ષા આપવાની હિંમત આપી હતી.
ગુજરાત માધ્યમિક અને ઉચ્ચતર માધ્યમિક શિક્ષણ બોર્ડ દ્વારા 1701 કેન્દ્રો પર ધોરણ 10 અને 12ની પરીક્ષાનો આજથી પ્રારંભ થયો છે. આજે ધોરણ 10 અને 12ના કુલ 15.27 લાખ જેટલા વિદ્યાર્થીઓએ પરીક્ષા આપી હતી.
રાજ્યમાં ધોરણ-૧૦ના ૯.૦૭ લાખથી વધુ, ધોરણ-૧૨ સામાન્ય પ્રવાહના ૫.૦૧ લાખથી વધુ, ધોરણ-૧૨ વિજ્ઞાન પ્રવાહના ૧.૧૯ લાખથી વધુ અને ગુજકેટના વિદ્યાર્થીઓ મળી રાજ્યભરના કુલ ૧૬.૬૩ લાખથી વિદ્યાર્થીઓ બોર્ડની પરીક્ષા આપશે. ધો-10નું પ્રથમ ભાષાનું પેપર હતુ. જે વિદ્યાર્થીઓને એકંદરે સરળ લાગ્યુ હતું. સુરતમાં પરીક્ષા આપવા જતા વિદ્યાર્થીઓનું બેન્ડબાજાથી સ્વાગત કરાયું હતું. જ્યારે રાજકોટમાં દ્વારિકાનો નાથ મારો રાજા રણછોડ છે ગીત સાથે આવકાર અપાયો હતો. વિદ્યાર્થીઓને તિલક કરી ફૂલ આપી મોઢું મીઠું કરાવી પ્રવેશ અપાયો હતો. તમામ પરીક્ષા કેન્દ્રો બહાર વાલીઓના ટોળા જોવા મળ્યા હતા. પરીક્ષા કેન્દ્રો પર પરીક્ષાર્થી નિર્ભયતાથી પરીક્ષા આપી શકે તે માટેની પણ વ્યવસ્થા કરવામાં આવી છે. પરીક્ષા કેન્દ્રની તમામ બિલ્ડિંગ CCTVથી સજ્જ કરવામાં આવી છે. તેમજ તમામ પરીક્ષા સેન્ટર પર આરોગ્ય વિભાગની ટીમ પણ હાજર રાખવામાં આવી છે. દિવ્યાંગ વિદ્યાર્થીઓને આ વખતે એક કલાકનો સમય વધારે આપવામાં આવશે.
વડોદરાના માંજલપુર વિસ્તારમાં આવેલી અંબે સ્કૂલમાં પરીક્ષા આપતી વખતે વિદ્યાર્થિની બેભાન થઈ ગઈ હતી. જેથી 108 એમ્બ્યુલન્સ સ્કૂલમાં પહોંચી હતી. પ્રાથમિક સારવાર આપ્યા બાદ વિદ્યાર્થિની ભાનમાં આવી અને ફરી પરીક્ષા આપવા માટે બેસતા વાલીએ હાશકારો અનુભવ્યો હતો. જ્યારે સુરતના અઠવાગેટ વિસ્તારમાં પરીક્ષાના સમયે મુશ્કેલીમાં મુકાયેલી આસિફા નામની વિદ્યાર્થિની માટે સુરત પોલીસ સાચા અર્થમાં ‘સારથી’ બનીને મદદે આવી હતી. ઉધના સ્થિત પરીક્ષા કેન્દ્ર પર પહોંચવા માટે સાધન ન મળતા અટવાયેલી આ વિદ્યાર્થિનીને સુરત પોલીસે સમયસૂચકતા વાપરી પોતાની ગાડીમાં સુરક્ષિત રીતે પરીક્ષા કેન્દ્ર સુધી પહોંચાડી હતી.
