Homeગુજરાતીગુજરાતથરા નજીક રેતી ભરેલા 10 ડમ્પરો જપ્ત કરાતા ખનીજ માફિયાઓએ કર્યો હુમલો

થરા નજીક રેતી ભરેલા 10 ડમ્પરો જપ્ત કરાતા ખનીજ માફિયાઓએ કર્યો હુમલો

થરા, 26 ફેબ્રુઆરી 2026: ગુજરાતમાં ખનીજ માફિયાઓ બેફામ થઈ રહ્યા છે. અને ખનીજચોરી અટકાવવા જતા અધિકારીઓ પર હુમલાના બનાવો બની રહ્યા છે. ત્યારે આવો એક વધુ બનાવ બનાસકાંઠાના થરા નજીક શુદ્રોસણ ગામ પાસે બન્યો છે. ગાંધીનગરથી ગયેલી ખાણ ખનીજ વિભાગની ફ્લાઈંગ સ્ક્વોડ પર હુમલો કરાયો હતો. ટીમે ગેરકાયદેસર રેતી ભરેલા 10 ડમ્પર જપ્ત કરતાં કેટલાક શખસોએ ખનીજ વિભાગના અધિકારીઓની કામગીરીમાં અવરોધ ઉભો કર્યો હતો.

આ બનાવની વિગત એવી છે કે, ગાંધીનગરથી ખાણ ખનીજ વિભાગની ફ્લાઈંગ સ્ક્વોડ બનાસકાંઠાના થરા નજીક શુદ્રોસણ ગામ પાસે પહોંચી હતી. જ્યાં ચેકિંગ કરતા રોયલ્ટી પાસ વિનાના ગેરકાયદે રેતી ભરેલા 10 ડમ્પરો પકડાયા હતા. રેતી ભરેલા ડમ્પરો પકડાતા કેટલાક શખસો દોડી આવ્યા હતા. અને અધિકારીઓને ધાક-ધમકી આપીને ફરજમાં રૂકાવટ કરી હતી. આ મામલે ગાંધીનગર ફ્લાઈંગ સ્ક્વોડના રોયલ્ટી ઇન્સ્પેક્ટર અજય નથુભાઈ ધ્રેવડાએ ફરિયાદ નોંધાવી છે. તેમની ફરિયાદ મુજબ,  રેતી ભરેલા ડમ્પરો જપ્ત કરાતા ચાર અજાણ્યા વાહનો સાથે શખસો આવીને કામગીરીમાં રૂકાવટ કરી હતી. ચાર શખસોએ અધિકારીઓ સાથે ગાળાગાળી અને મારામારી કરી હતી. આ હુમલામાં સિક્યુરિટી ગાર્ડને ઈજા પહોંચી હતી. તેમજ હુમલાખોરોએ ઈજાગ્રસ્ત સિક્યુરિટી ગાર્ડ પાસેથી રૂ. 10,000ની રુદ્રાક્ષ માળા, ચશ્મા અને ટ્રકોની ચાવીઓ બળજબરીથી છીનવી લીધી હતી. ત્યારબાદ રેતી ખાલી કરાવી વાહનો ભગાડવાનો પ્રયાસ પણ કર્યો હતો. ખાણ ખનીજ વિભાગે તાત્કાલિક 112 પર જાણ કરતા પોલીસ ઘટના સ્થળે પહોંચી હતી. પોલીસે તમામ ટ્રકોને સીઝ કરીને થરા પોલીસ મથકે લાવી હતી.

spot_img
spot_img
સંબંધિત લેખો
spot_img
spot_img

Most Popular

spot_img