ડીસાઃ 23 મે 2025ના રોજ રાત્રે ગુજરાતના બનાસકાંઠા જિલ્લામાં ભારતીય ક્ષેત્રમાં પ્રવેશવાનો પ્રયાસ કરી રહેલા એક પાકિસ્તાની ઘુસણખોરને સતર્ક બીએસએફના જવાનોએ સફળતાપૂર્વક ઠાર કરી દીધો હતો. BSF જવાનોએ એક શંકાસ્પદ વ્યક્તિને આંતરરાષ્ટ્રીય સરહદ પાર કરીને ભારતીય ક્ષેત્રમાં પ્રવેશતા જોયો હતો. સૈનિકોએ તેને ચેતવણી આપી પણ તે આગળ વધતો રહ્યો હતો. પરિસ્થિતિ જોઈને BSF જવાનોએ ગોળીબાર કર્યો હતો, જેમાં ઘુસણખોર ઘટનાસ્થળે જ માર્યો ગયો હતો.
દરમિયાન યુપીના બહરાઇચમાં ભારત-નેપાળ સરહદ પર એસએસબીએ એક શંકાસ્પદ વ્યક્તિને પકડી લેવામાં આવ્યો હોવાનું જાણવા મળે છે. તેની ભાષા એકદમ વિચિત્ર છે. જે સ્થાનિક રહેવાસીઓથી તદ્દન અલગ છે. SSB પૂછપરછ દરમિયાન તેણે પાકિસ્તાનનું નામ લીધું છે. તેની વધુ પૂછપરછ ચાલી રહી છે. આ મામલો મોતીપુર વિસ્તારનો છે. અહીં એક યુવાન ભારત-નેપાળ સરહદ પર ફરતો હતો. જ્યારે SSB જવાનોને શંકા ગઈ, ત્યારે તેમણે તેને રોક્યો હતો. સુરક્ષા જવાનોએ તેની સાથે વાત કરી અને તેનું સરનામું પૂછ્યું હતું. તેણે જે ભાષામાં આનો જવાબ આપ્યો તે શરૂઆતમાં કોઈને સમજાયું ન હતું. આનાથી શંકા વધુ ઘેરી બની હતી. જેથી SSB જવાનોએ તેને કસ્ટડીમાં લીધો હતો. પ્રાથમિક પૂછપરછ દરમિયાન તેણે પાકિસ્તાનનું નામ લીધું છે.
