અમદાવાદઃ શહેરમાં છેલ્લા કેટલાક સમયથી માર્ગ અકસ્માતની ઘટનાઓમાં નોંધપાત્ર વધારો થયો છે. દરમિયાન શહેરના થલતેજ વિસ્તારમાં પૂરઝડપે પસાર થતા ટ્રકે એક ઓટોરિક્ષાને અડફેટે લીધી હતી. આ દૂર્ઘટનામાં એક વ્યક્તિનું મોત થયું હતું. અકસ્માત સર્જીને ટ્રક ચાલક ફરાર થઈ ગયો હતો.
પ્રાપ્ત માહિતી અનુસાર અમદાવાદના થલતેજ બ્રિજ પાસે હિટ એન્ડ રનની ઘટના સર્જાઇ હતી. જેમાં રીક્ષામાં સવાર મુસાફર રીક્ષામાંથી ઉતરી રહ્યો હતો તે દરમિયાન પાછળથી પૂરપાટ ઝડપે આવી રહેલી ટ્રકે મુસાફરને ટક્કર મારી હતી. આ અકસ્માતમાં 24 વર્ષીય ગૌતમ ચૌહાણ નામના વ્યક્તિનું મોત નીપજ્યું હતું. અકસ્માત સર્જાયા બાદ ટ્રકચાલક ફરાર થઇ ગયો હતો.
અકસ્માતની જાણ થતાં પોલીસનો કાફલો ઘટનાસ્થળે દોડી આવ્યો હતો અને મૃતકની ઓળખ કરી તેના મૃતદેહને પોસ્ટમોર્ટમ માટે મોકલી દેવામાં આવ્યો હતો. હાલમાં પોલીસ ફરાર ટ્રક ચાલકની શોધખોળ કરી રહી છે. પોલીસે ગુનો નોંધી વધુ તપાસ હાથ ધરી હતી.
