- પોલીસે તૈયાર કરેલી યાદીમાં 3264 બુટલેગરો, 179 ખનીજ માફિયાનો સમાવેશ
- માથાભારે તત્વો સામે પાસા અને હદપારી સહિત અટકાયતીના પગલાં લેવાશે
- ગુંડાગીરી કરનારા તત્વો સામે આકરા પગલાં લેવાશે
અમદાવાદઃ શહેરના વસ્ત્રાલ વિસ્તારમાં અસામાજિક તત્વોના આતંક બાદ રાજ્યના પોલીસ વડાએ 100 કલાકમાં ગુંડા તત્વોની યાદી તૈયાર કરવાનો આદેશ આપ્યો હતો. રાજ્યના તમામ જિલ્લા અને પોલીસ સ્ટેશનો દ્વારા અસામાજિક તત્વોની યાદી તૈયાર કરી દેવામાં આવી છે. જે મુજબ વિવિધ ગુનાઈત પ્રવૃતિઓમાં સંડોવાયેલા 7612 વ્યક્તિઓની નામ જોગ યાદી તૈયાર કરવામાં આવી છે. હવે પોલીસ દ્વારા તેમની સામે પાસા, હદપારી સહિતના પગલાં લેવાશે.
અમદાવાદ શહેર તથા સુરત સહિત મહાનગરો તેમજ નાનામોટા શહેરો અને ગ્રામ્ય વિસ્તારોમાં માથાભારે ગણાતા ગુનાઈત પ્રવૃતિઓમાં સંડાવાયેલા સામે પોલીસે લાલ આંખ કરી છે. રાજ્યના પોલીસ વડાએ આપેલા આદેશ અન્વયે ગુજરાત પોલીસે કુલ- 7612 ગુનાઈત પ્રવૃતિઓ ધરાવતા ઇસમોની યાદી તૈયાર કરી છે. જેમાં 3264 બુટલેગરો,516 જુગાર, 2149 શરીર સબંધી, 958 મિલકત સબંધી, 179 માઇનિ અને 545 અન્ય અસામાજીક પ્રવૃતિ કરતા ઇસમો ઉપર વોચ રાખીને તેમના ગેરકાયદેસર દબાણો, ગેરકાયદેસર વીજ જોડાણો, શંકાસ્પદ આર્થિક વ્યવહારો, તેઓના અનઅધિકૃત નાણાંકીય વ્યવહારોની તપાસ કરવામા આવશે.
સૂત્રોમાંથી જાણવા મલ્યા મુજબ સમગ્ર રાજ્યમાં અમદાવાદ શહેરમાં 25, ગાંધીનગરમાં 6, વડોદરા શહેરમાં 2, સુરતમા 7, મોરબીમાં 12 એમ, કુલ 59 લોકો સામે પાસા કરેલા છે, 10 ઇસમો વિરુધ્ધ હદપારી કરેલ છે, 724 ઇસમો વિરૂધ્ધ અટકાયતી પગલાં લીધા છે અને 16 ગેરકાયદેસર મકાનોમાં ડીમોલેશન કરેલ છે અને 81 વીજ ચોરીના ગેરકાયદેસર કનેક્શન દૂર કરેલ છે. તેમજ આગામી સમયમાં આશરે 100 પાસા, 120 હદપારી, 265 અટકાયતી પગલાં, 200 જેટલા ડીમોલેશન અને 225 જેટલા ગેરકાયદેસર વીજ જોડાણો દૂર કરવામાં આવશે. આ સમયગાળા દરમિયાન કોમ્બીંગ, નાઈટ પેટ્રોલીંગ, રેઇડ, વાહન ચેકીંગ, ફુટ પેટ્રોલીંગ, ગુનેગારોના જામીનમાં શરતભંગ થયેલ હોય તેવા કિસ્સામાં જામીન રદ્દ કરવાની કાર્યવાહી હાથ ધરવામાં આવશે.
