પ્રધાનમંત્રી નરેન્દ્ર મોદી આજથી દક્ષિણ આફ્રિકાના જોહાનિસબર્ગમાં શરૂ થઈ રહેલા G20 નેતાઓના શિખર સંમેલનમાં ભાગ લેશે
નવી દિલ્હી: પ્રધાનમંત્રી નરેન્દ્ર મોદી આજથી દક્ષિણ આફ્રિકાના જોહાનિસબર્ગમાં શરૂ થઈ રહેલા G20 નેતાઓના શિખર સંમેલનમાં ભાગ લેશે. ત્રણ દિવસીય શિખર સંમેલનમાં મોદી તમામ સત્રોમાં ભાગ લેશે અને ભારતની મુખ્ય પ્રાથમિકતાઓ રજૂ કરશે, જેમાં ગ્લોબલ સાઉથની ચિંતાઓ, ટકાઉ વિકાસ, આબોહવા કાર્યવાહી, ઊર્જા સંક્રમણ અને વૈશ્વિક વહીવટમાં સુધારાનો સમાવેશ થાય છે. 2014 બાદ પ્રધાનમંત્રી મોદીનું આ 12મું G20 શિખર સંમેલન છે.આ શિખર સંમેલન પહેલી વાર આફ્રિકન ખંડ પર યોજાઈ રહ્યું હોવાથી ખાસ મહત્વ ધરાવે છે. આ વર્ષની વિષય વસ્તુ “એકતા, સમાનતા અને ટકાઉપણું” છે. દક્ષિણ આફ્રિકાએ તેના પ્રમુખપદ હેઠળ મુખ્ય પ્રાથમિકતાઓ પર ધ્યાન કેન્દ્રિત કર્યું છે, જેમાં આપત્તિ સ્થિતિસ્થાપકતાને મજબૂત બનાવવી, ઓછી આવક ધરાવતા દેશો માટે દેવાનું ટકાઉપણું સુનિશ્ચિત કરવી, ન્યાયી ઊર્જા સંક્રમણ માટે નાણાં એકત્ર કરવા અને સમાવિષ્ટ અને ટકાઉ વિકાસને પ્રોત્સાહન આપવા માટે મહત્વપૂર્ણ ખનિજોનો ઉપયોગ કરવાનો સમાવેશ થાય છે.
પ્રધાનમંત્રી મોદી ગઈકાલે સાંજે શિખર સંમેલનમાં ભાગ લેવા માટે જોહાનિસબર્ગ પહોંચ્યા છે. પ્રધાનમંત્રી નરેન્દ્ર મોદીએ દક્ષિણ આફ્રિકાના જોહાનિસબર્ગમાં G-20 શિખર સંમેલન દરમિયાન ગઈકાલે ઓસ્ટ્રેલિયાના પ્રધાનમંત્રી એન્થોની અલ્બેનીઝ સાથે વાતચીત કરી હતી. બંને નેતાઓએ વ્યાપક વ્યૂહાત્મક ભાગીદારીના પાંચ વર્ષ પૂર્ણ થવાના પ્રસંગે દ્વિપક્ષીય સંબંધોની નોંધપાત્ર ઊંડાઈ અને વિવિધતા પર સંતોષ વ્યક્ત કર્યો હતો. બેઠકમાં સંરક્ષણ અને સુરક્ષા, મહત્વપૂર્ણ ખનિજો, વેપાર અને રોકાણ, શિક્ષણ અને લોકો વચ્ચેના આદાનપ્રદાન સહિત અનેક ક્ષેત્રોમાં દ્વિપક્ષીય સહયોગ વધારવાની ચર્ચા કરવામાં આવી હતી. બંને નેતાઓએ આતંકવાદ સામે વૈશ્વિક લડાઈને મજબૂત બનાવવાની તેમની પ્રતિબદ્ધતાનો પુનરોચ્ચાર કર્યો હતો. ઓસ્ટ્રેલિયાના પ્રધાનમંત્રીએ ભારતમાં તાજેતરના આતંકવાદી હુમલામાં માર્યા ગયેલા લોકોના પરિવારો પ્રત્યે પણ સંવેદના વ્યક્ત કરી હતી.
સોશિયલ મીડિયા પોસ્ટમાં મોદીએ જણાવ્યું હતું કે તેઓએ સંરક્ષણ અને સુરક્ષા, પરમાણુ ઊર્જા અને વેપાર ક્ષેત્રો જ્યાં સંબંધોને વધુ વિસ્તૃત કરવાની અપાર સંભાવના અંગે ચર્ચા કરી.પ્રધાનમંત્રીએ દક્ષિણ આફ્રિકાની બહુરાષ્ટ્રીય ઇન્ટરનેટ અને ટેકનોલોજી કંપની નેસ્પર્સના ચેરમેન કૂસ બેકર અને મુખ્ય કાર્યકારી અધિકારી ફેબ્રિસિયો બ્લોસી સાથે પણ મુલાકાત કરી. તેમણે ભારતના ડિજિટલ ઇકોસિસ્ટમ, આર્ટિફિશિયલ ઇન્ટેલિજન્સ, સ્ટાર્ટઅપ્સ અને અવકાશ ક્ષેત્રોમાં રોકાણ વધારવા તેમજ ગ્રાહક બજાર અને ટેકનોલોજીમાં નવી તકો શોધવા અંગે ચર્ચા કરી.
બાદમાં પ્રધાનમંત્રી મોદીએ જોહાનિસબર્ગમાં ભારતીય મૂળના ટેક ઉદ્યોગસાહસિકો અને દક્ષિણ આફ્રિકામાં ભારતીય સમુદાય સાથે વાતચીત કરી અને તેમને ભારત સાથેના તેમના સંપર્કને વધુ મજબૂત બનાવવા વિનંતી કરી. પ્રધાનમંત્રીએ જણાવ્યું હતું કે ભારતીય મૂળના ટેક ઉદ્યોગસાહસિકો સાથેની વાતચીતમાં તેઓએ ફિનટેક, સોશિયલ મીડિયા પ્લેટફોર્મ, કૃષિ, શિક્ષણ, આરોગ્યસંભાળ, તબીબી ઉપકરણો જેવા ક્ષેત્રોમાં તેમના કાર્યની ચર્ચા કરી. પ્રધાનમંત્રીને ચિન્મય મિશન તરફથી ‘કલશ’ પણ ભેટમાં આપવામાં આવ્યું હતું, જેમાં ભારત અને દક્ષિણ આફ્રિકાના શ્રી અન્ન અથવા બાજરીનો સમાવેશ થાય છે. તેમણે કહ્યું કે તેને ડર્બનના અન્નપૂર્ણા દેવી મંદિરમાં મૂકવામાં આવશે.શ્રી મોદીએ દક્ષિણ આફ્રિકામાં આયોજિત ‘ભારત જાણો’ સ્પર્ધાના વિજેતાઓ સાથે પણ મુલાકાત કરી.
