દ્વારકા, 4 સપ્ટેમ્બર, 2026 : Today is the birth anniversary of Shri Krishna યાત્રાધામ દ્વારકામાં આજે કૃષ્ણ જન્મોત્સવ ભારે આનંદોલ્લાસથી ઊજવાશે. ગઈકાલે સાંજથી મોટી સંખ્યામાં શ્રદ્ધાળુઓ દ્વારકા આવી પહોંચ્યા છે. જગત મંદિરને રંગબેરંગી રોશનીથી શણગારવામાં આવ્યું છે. નંદ ઘેર આનંદ ભયો, જય કનૈયાલાલ કી ના નાદ સાથે દ્વરકાનગરીમાં અનોખો માહોલ જોવા મળી રહ્યો છે.
જન્માષ્ટમી પર્વને લઈને જગત મંદિર દ્વારા અગાઉથી જ તમામ તૈયારીઓ પૂર્ણ કરી લેવામાં આવી છે. ભગવાન શ્રીકૃષ્ણના 5253મા જન્મોત્સવને અનુલક્ષીને લાખોની સંખ્યામાં ઉમટી પડનાર ભક્તો સુગમતાથી દર્શન કરી શકે તે માટે મંદિર વહીવટી તંત્ર દ્વારા જગત મંદિરના નિત્યક્રમ અને દર્શનના સમયમાં વિશેષ ફેરફાર કરવામાં આવ્યા છે. આજે જન્માષ્ટમીના પર્વદિને સવારે 6 વાગ્યે ભગવાન દ્વારકાધીશની મંગલા આરતી સાથે પર્વની દિવ્ય શરૂઆત થશે. સવારે 6 થી 8 વાગ્યા સુધી ભક્તો મંગલા દર્શનનો લાભ લઈ શકશે. ત્યારબાદ 8 થી 9 વાગ્યા દરમિયાન ખુલ્લા પડદે ભગવાનને સ્નાન કરાવવામાં આવશે અને 9 થી 9:45 સુધી ભીતરમાં પૂજા અર્ચના સંપન્ન થશે.
સવારના ક્રમ આગળ વધારતા 9:45 થી 10 વાગ્યા સુધી સ્નાન ભોગ અર્પણ કરાશે, ત્યારબાદ સવારે 10:15 થી 10:45 સુધી ભક્તો માટે દર્શન ખુલ્લા રહેશે. 10:45 થી 11 વાગ્યા સુધી પુનઃ સ્નાન ભોગ અર્પણ કર્યા બાદ સવારે 11 વાગ્યે ભગવાન દ્વારકાધીશની ભવ્ય શૃંગાર આરતી યોજાશે. શૃંગાર આરતી બાદ સવારે 11 થી 11:20 સુધી ભક્તો દર્શન કરી શકશે. 11:20 થી 11:30 દરમિયાન ગ્વાલ ભોગ અર્પણ કરાશે અને 11:30 થી બપોરે 12 વાગ્યા સુધી ભક્તો માટે દર્શન ખુલ્લા રહેશે. બપોરે 12 થી 12:30 દરમિયાન ભગવાનને રાજભોગ અર્પણ કરવામાં આવશે અને 12:30 થી 1 વાગ્યા સુધી ભક્તો દર્શનનો લાભ મેળવી શકશે. આ પછી બપોરે 1 થી સાંજે 5 વાગ્યા સુધી જગત મંદિર ભક્તો માટે બંધ રહેશે.
સાંજના સત્રમાં નિયમિત ક્રમ મુજબ સાંજે 5 વાગ્યે ઉથાપન દર્શન થશે. સાંજે 5 થી 5:45 દરમિયાન ભક્તો ભગવાનના દર્શન કરી શકશે, જ્યારે 5:45 થી 6 વાગ્યા દરમિયાન ઉથાપન ભોગ અર્પણ કરાશે. સાંજે 6 થી 7:30 વાગ્યા સુધી ભક્તો માટે દર્શન પુનઃ ખુલ્લા મૂકવામાં આવશે. 7:30 થી 7:45 દરમિયાન સંધ્યા ભોગ અર્પણ કરાશે અને 7:45 થી 8 વાગ્યા સુધી ભગવાન દ્વારકાધીશની સંધ્યા આરતી થશે. રાત્રે 8 થી 8:10 સુધી શયન ભોગ અર્પણ કર્યા બાદ 8:10 થી 8:30 સુધી મંદિર ખુલ્લું રહેશે. રાત્રે 8:30 વાગ્યે ભગવાન દ્વારકાધીશની શયન આરતી સંપન્ન થશે અને 8:30 થી 9 વાગ્યા સુધી ભક્તો દર્શન કરી શકશે.
રાત્રે 9 થી 12 વાગ્યા સુધી ઉત્સવના વિશેષ આયોજન અને મધ્યરાત્રિના આગમનને ધ્યાનમાં રાખીને જગત મંદિર બંધ રહેશે. ત્યારબાદ રાત્રે બરાબર 12 વાગ્યે જગત મંદિર ખાતે ભવ્ય જન્મોત્સવ આરતી ગૂંજશે. મધ્યરાત્રિએ 12 થી અઢી વાગ્યા (2:30) સુધી લાખો શ્રદ્ધાળુઓ માટે જન્મોત્સવના અલૌકિક દર્શન ખુલ્લા રહેશે, અને ત્યારબાદ રાત્રે 2:30 વાગ્યે દ્વારકાધીશ મંદિર આશીર્વાદ સાથે વિધિવત બંધ થશે.
