નવી દિલ્હીઃ દિલ્હી ઇન્ટરનેશનલ લેધર એક્સ્પો, 20-21 ફેબ્રુઆરી દરમિયાન યશોભૂમિ કન્વેન્શન સેન્ટર ખાતે યોજાશે. આંતરરાષ્ટ્રીય લેધર એક્સ્પો 2025 ઉત્પાદકો, નિકાસકારો માટે મજબૂત પ્લેટફોર્મ પૂરું પાડશે
કાઉન્સિલ ઓફ લેધર એક્સપોર્ટ્સ (સીએલઈ) 20-21 ફેબ્રુઆરીના રોજ રાજધાની નવી દિલ્હીમાં દ્વારકાના યશોભૂમિ કન્વેન્શન સેન્ટર ખાતે દિલ્હી ઇન્ટરનેશનલ લેધર એક્સ્પો (ડીઆઈએલઈએક્સ) 2025નું આયોજન કરવા જઈ રહી છે. ડીઆઈએલઈએક્સ, ‘મેક ઇન ઇન્ડિયા’ અને ‘આત્મનિર્ભર ભારત’ પહેલ સાથે મળીને નિકાસ અને રોજગારને વેગ આપશે.
વાણિજ્ય અને ઉદ્યોગ મંત્રાલયે એક નિવેદનમાં જણાવ્યું હતું કે, યશોભૂમિ કન્વેન્શન સેન્ટર ખાતે યોજાનાર ડીઆઈએલઈએક્સ 2025 એક મુખ્ય બિઝનેસ-ટુ-બિઝનેસ (બી2બી) ઇવેન્ટ છે. તે ઉત્પાદકો અને નિકાસકારોને તેમના નવીનતમ સંગ્રહો, નવીનતાઓ અને ક્ષમતાઓ આંતરરાષ્ટ્રીય ખરીદદારો સમક્ષ પ્રદર્શિત કરવા માટે એક મજબૂત પ્લેટફોર્મ પૂરું પાડવા માટે રચાયેલ છે જેઓ વ્યવહારુ સોર્સિંગ વિકલ્પો શોધી રહ્યા છે.
લેધર એક્સપોર્ટ કાઉન્સિલના ચેરમેન રાજેન્દ્ર કુમાર જાલાન એ જણાવ્યું હતું કે, કેન્દ્રીય બજેટમાં કરવામાં આવેલી જાહેરાતો ભારતના ચામડા અને ફૂટવેર ક્ષેત્ર માટે મહત્વપૂર્ણ છે, જે ‘મેક ઇન ઇન્ડિયા’ અને ‘આત્મનિર્ભર ભારત’ પહેલ હેઠળ વૈશ્વિક ઉત્પાદન અને સોર્સિંગ હબ તરીકે ઝડપથી ઉભરી રહ્યું છે. સીએલઈ 2030 સુધીમાં 47 અબજ અમેરિકી ડોલરના વ્યવસાય સુધી પહોંચવાનું લક્ષ્ય રાખે છે. આમાંથી, 13.7 અબજ અમેરિકી ડોલર નિકાસ ક્ષેત્ર માટે છે.
