પુતિનથી નારાજગી વ્યક્ત કરીને ટ્રમ્પે રશિયા ઉપર નવા પ્રતિબંધો લગાવવાનો આપ્યો સંકેત
યુએસ પ્રમુખ ડોનાલ્ડ ટ્રમ્પે કહ્યું છે કે તેમણે યુક્રેનને વધારાના શસ્ત્રો મોકલવાની મંજૂરી આપી છે અને રશિયા પર નવા પ્રતિબંધો પર વિચાર કરી રહ્યા છે. સમાચાર એજન્સી સિન્હુઆ અનુસાર, ટ્રમ્પે મંગળવારે વ્હાઇટ હાઉસમાં કેબિનેટની બેઠક દરમિયાન કહ્યું હતું કે, “અમે યુક્રેનને કેટલાક રક્ષણાત્મક શસ્ત્રો મોકલી રહ્યા છીએ અને મેં તેને મંજૂરી આપી છે.” રશિયન પ્રમુખ વ્લાદિમીર પુતિન પર નારાજગી વ્યક્ત કરતા તેમણે કહ્યું હતું કે, “હું પુતિનથી ખુશ નથી. હું હમણાં જ તમને એટલું કહી શકું છું કે રશિયન અને યુક્રેનિયન સૈનિકો હજારોની સંખ્યામાં મૃત્યુ પામી રહ્યા છે.”
ટ્રમ્પે એમ પણ કહ્યું હતું કે તેઓ રશિયા પર વ્યાપક પ્રતિબંધો લાદતા દ્વિપક્ષીય સેનેટ બિલને સમર્થન આપવાનું વિચારી રહ્યા છે. સોમવારે અગાઉ, ટ્રમ્પે રશિયા દ્વારા નવા પ્રાદેશિક કબજાનો દાવો કર્યા પછી યુક્રેનને વધારાના શસ્ત્રો મોકલવાની જાહેરાત કરી હતી. યુક્રેન પર રશિયાના ભારે હુમલાઓનો ઉલ્લેખ કરતા, ટ્રમ્પે કહ્યું હતું કે યુક્રેનને નિશાન બનાવવામાં આવી રહ્યું છે. તેમણે કહ્યું હતું કે, “અમે વધુ શસ્ત્રો મોકલીશું, મુખ્યત્વે રક્ષણાત્મક શસ્ત્રો.” તાજેતરમાં, અમેરિકાએ અચાનક કિવમાં કેટલાક શસ્ત્રોનું શિપમેન્ટ બંધ કરી દીધું હતું, જેનાથી યુક્રેનિયન અધિકારીઓ આશ્ચર્યચકિત થયા હતા અને તેમણે સમજૂતી માંગી હતી.
થોડા દિવસ પહેલા, ટ્રમ્પે પુતિન સાથે ફોન પર વાતચીત કર્યા પછી યુક્રેનમાં સંઘર્ષના ઉકેલમાં કોઈ પ્રગતિ ન થવા પર નારાજગી વ્યક્ત કરી હતી. તેમણે કહ્યું હતું કે, “અમે યુક્રેનમાં યુદ્ધ સહિત ઘણા મુદ્દાઓ પર વાત કરી હતી. હું આ પરિસ્થિતિથી ખુશ નથી.” તેમણે કહ્યું હતું કે રશિયન રાષ્ટ્રપતિ વ્લાદિમીર પુતિન સાથે ફોન પર વાતચીત કર્યા પછી પણ, આ સંઘર્ષના ઉકેલમાં કોઈ પ્રગતિ થઈ નથી. ક્રેમલિનના સહાયક યુરી ઉષાકોવે કહ્યું હતું કે પુતિન અને ટ્રમ્પ વચ્ચેની ટેલિફોન વાતચીત લગભગ એક કલાક ચાલી હતી.
રશિયન રાષ્ટ્રપતિ કાર્યાલયના નિવેદન અનુસાર, ટ્રમ્પ અને પુતિન વચ્ચેની વાતચીતમાં યુક્રેન મુદ્દા પર ચર્ચા થઈ હતી. ટ્રમ્પે શક્ય તેટલી વહેલી તકે યુદ્ધનો અંત લાવવાની જરૂરિયાતનો પુનરોચ્ચાર કર્યો હતો. જવાબમાં, પુતિને કહ્યું કે રશિયા હજુ પણ સંઘર્ષનો રાજકીય અને વાટાઘાટો દ્વારા ઉકેલ શોધી રહ્યું છે. તેમણે ટ્રમ્પને ઇસ્તંબુલમાં બીજી સીધી રશિયા-યુક્રેન વાટાઘાટો દરમિયાન થયેલા માનવતાવાદી કરારોના અમલીકરણમાં થયેલી પ્રગતિ વિશે માહિતી આપી હતી. પુતિને એમ પણ કહ્યું હતું કે રશિયા વાટાઘાટો ચાલુ રાખવા માટે તૈયાર છે.
નિવેદનમાં વધુમાં કહેવામાં આવ્યું છે કે પુતિને રશિયાના લક્ષ્યોને પ્રાપ્ત કરવા માટે પ્રતિબદ્ધતા વ્યક્ત કરી હતી, ખાસ કરીને વર્તમાન પરિસ્થિતિ અને તીવ્ર મુકાબલા તરફ દોરી ગયેલા મૂળ કારણોને દૂર કરવા માટે. રશિયા આ લક્ષ્યોથી પાછળ હટશે નહીં. યુરી ઉષાકોવના જણાવ્યા મુજબ, વાટાઘાટોમાં ઈરાન અને મધ્ય પૂર્વની પરિસ્થિતિ પર પણ વિગતવાર ચર્ચા કરવામાં આવી હતી.
