પોલીસે પાકિસ્તાન માટે જાસૂસી કરવાના આરોપસર નૌકા ભવનના અપર ડિવિઝન ક્લાર્ક (યુડીસી) વિશાલ યાદવની ધરપકડ કરી છે. વિશાલ સોશિયલ મીડિયા દ્વારા ગુપ્ત માહિતી મોકલતો હતો. રાજસ્થાન પોલીસની ગુપ્તચર શાખાએ નવી દિલ્હીથી તેની ધરપકડ કરી હતી.
પોલીસ મહાનિરીક્ષક (સીઆઈડી-સુરક્ષા) વિષ્ણુકાંત ગુપ્તાએ જણાવ્યું હતું કે યુડીસી વિશાલ યાદવની ‘ઓફિશિયલ સિક્રેટ્સ એક્ટ 1923’ હેઠળ ધરપકડ કરવામાં આવી હતી. તે પુંસિકા રેવાડી (હરિયાણા)નો રહેવાસી છે. ગુપ્તાએ જણાવ્યું હતું કે રાજસ્થાન પોલીસની ‘સીઆઈડી-ઇન્ટેલિજન્સ’ પાકિસ્તાની ગુપ્તચર એજન્સીઓની જાસૂસી પ્રવૃત્તિઓ પર સતત નજર રાખી રહી હતી.
તેમણે કહ્યું, “એવું બહાર આવ્યું છે કે દિલ્હીના નૌકા ભવન સ્થિત ‘ડોકયાર્ડ ડાયરેક્ટરેટ’માં કામ કરતો વિશાલ યાદવ સોશિયલ મીડિયા દ્વારા પાકિસ્તાની ગુપ્તચર એજન્સીની એક મહિલા હેન્ડલર સાથે સતત સંપર્કમાં હતો. આ મહિલા, જેનું ઉપનામ પ્રિયા શર્મા હોવાનું કહેવાય છે, તે નૌકા ભવનમાંથી વ્યૂહાત્મક મહત્વની ગુપ્ત માહિતી મેળવવા માટે વિશાલને પૈસાની લાલચ આપી રહી હતી.”
ગુપ્તાએ કહ્યું, “પ્રારંભિક તપાસમાં જાણવા મળ્યું છે કે વિશાલ યાદવ ઓનલાઈન ગેમ્સ રમવાનો વ્યસની હતો અને પોતાની નાણાકીય જરૂરિયાતો પૂરી કરવા માટે તેણે પાકિસ્તાનની મહિલા હેન્ડલરને સંવેદનશીલ માહિતી આપવાનું શરૂ કર્યું હતું.” તેને તેના ક્રિપ્ટોકરન્સી ટ્રેડિંગ એકાઉન્ટમાં ‘USDT’ અને સીધા તેના બેંક એકાઉન્ટમાં પૈસા મળતા હતા.”
શંકાસ્પદના મોબાઇલમાંથી મળેલા ચેટ અને દસ્તાવેજોથી જાણવા મળ્યું છે કે વિશાલે ‘ઓપરેશન સિંદૂર’ અભિયાન દરમિયાન પણ પાકિસ્તાની મહિલાને નૌકાદળ અને અન્ય સંરક્ષણ સંબંધિત ગુપ્ત માહિતી પૂરી પાડી હતી. ઘણી ગુપ્તચર એજન્સીઓ સંયુક્ત રીતે જયપુરના સેન્ટ્રલ ઇન્ટરોગેશન સેન્ટરમાં વિશાલની પૂછપરછ કરી રહી છે. તે પણ જાણવા મળી રહ્યું છે કે તેણે અત્યાર સુધી પાકિસ્તાનને શું મોકલ્યું છે.
